22.8 C
Prizren
E hënë, 8 Gusht, 2022

Partitë në Prizren, garojnë me programe zgjedhore

Partite-Logot8-03Partitë politike në Prizren për herë të parë në zgjedhjet e nëntorit të këtij viti do të garojnë me programe konkrete zgjedhor. LDK-ja, AAK-LDD-ja, BD-ja dhe Lëvizja Vetëvendosje! janë në fazën përfundimtare të hartimit të programit të tyre zgjedhor.

Kandidati i AAK-së-LDD-së për kryetar të Prizrenit, Lulëzim Kabashi tha se aktualisht është në fazën përfundimtare të hartimit të programit me të cilin do të garojë në zgjedhjet e nëntorit. Ai shpreson se ky program do të mirëpritet nga qytetarët.”Jam duke e punuar programin me të cilin do të garoj për kryetar të Prizrenit”, tha Kabashi.

Ai nuk dyshon aspak në fitoren e 3 nëntorit të këtij viti. Sipas tij, fitorja në nëntor do të jetë e padiskutueshme, pikërisht për shkak programit me të cilin do të garojë. “ Është e padiskutueshme që do të fitoj në zgjedhjet e nëntorit. Jam i sigurt se programi zgjedhor do të përkrahet dhe përqafohet nga qytetarët ”, tha Kabashi për “PrizrenPress”.

Edhe kandidati tjetër i BD-së për kryetar të Prizrenit, Zafir Berisha tha se në zgjedhjet e nëntorit do të garojë me program zgjedhor. Sipas tij, programi i BD-së do të jetë konkretë në zgjidhjen e problemeve dhe përmisimin e jetës së qytetarëve.”BD-ja do të jetë një alternativë për nxjerrjen nga korrupsioni të Prizrenit dhe përmisimin e jetës së qytetarëve”, tha Berisha. Sipas tij, pushteti aktual e ka degraduar dhe shndërruar Komunën e Prizrenit në anarki.”BD-ja do t’ia kthej dinjitetin qytetarëve dhe Prizrenit”, tha Berisha.

Në nëntor me program zgjedhor do të garojë edhe kandidati i LDK-së për kryetar të Prizrenit, Eqrem Kryeziu. Zëdhënësi i LDK-së, Nderim Gashi tha se aktualisht janë në fazën përfundimtare të hartimit të programit zgjedhor. “Oferta jonë do të jetë e pranueshme nga shumica e qytetarëve të Prizrenit. Do jetë një program që do të bëjë kthesën e madhe ku qyteti ynë do hyjë në një fazë të zhvillimit të hovshëm ekonomik”, tha Gashi.

Ai tregon se LDK- ja në Prizren ka kohë që ka nisur përgatitjet për zgjedhjet e nëntorit. “Kemi filluar me aktivitete ende pa u zyrtarizuar kandidati për kryetar të Komunës. Në këtë aspekt të organizimit jemi mirë dhe jemi të bindur se do t’i përmbushim të gjitha detyrat që ia kemi përcaktuar vetës”, tha Gashi.

Kryetari i Lëvizjes Vetëvendosje! në Prizren, Arbër Rexhaj, ndërkaq tha se në zgjedhjet e nëntorit Vetëvendosje! në këtë qytet do të jetë subjekti i vetëm që do ta ketë alternativën lokale të shtypur. ”Alternativa e Vetëvendosjes në Prizren do të jetë e shtypër dhe t’iu shpërndahet qytetarëve të komunës sonë. Do të jetë hibridizim mes alternativës qendrore”, tha Rexhaj. Sipas tij, alternativa e Lëvizjes Vetëvendosje! do t’i ketë parasysh shumë seriozisht edhe specifikat e qyteti të Prizrenit.”Ekonomia lokale do të jetë pikë -qëndrimi ynë alternativ”, tha Rexhaj për “PrizrenPress”.

Ai tregon se në alternativën e Lëvizjes Vetëvendosje! në Prizren, parashihet luftimi i korrupsionit, depolitizimi i arsimit, shëndetësisë dhe sektorëve të tjerë. ” Arsimi në Prizren duhet të depolitizohet, kurse shëndetësia duhet t’i kthehet qytetarit përmes pastrimit të korrupsionit brenda saj”, tha Rexhaj.

Ai tregon VV-ja do të dalë me alternativë edhe për infrastrukturën. “Ne do të ofrojmë alternativën të njëmend për qytetarin, si dhe do të jemi shembull i mirë i qeverisjes nëse këtë na beson qytetari i Komunës sonë”, tha Rexhaj. /PrizrenPress.com/

Më Shumë

Lajmet e Fundit