Në Komisionin Qendror të Zgjedhjeve nuk ka aplikuar ende asnjë subjekt politik për certifikim për pjesëmarrje në zgjedhjet lokale që do të mbahen më 3 nëntor. Subjektet parlamentare janë më komode në këtë drejtim, ngase nuk kanë asnjë borxh të mbetur nga zgjedhjet e fundit, por e njëjta nuk ndodhë me subjektet jashtë parlamentare, borxhi i përgjithshëm i së cilave kalon mbi 40 mijë euro.
Asnjë prej partive parlamentare nuk kanë borxhe të mbetura nga zgjedhjet e kaluara. Këtë e konfirmon udhëheqësja e zyrës për regjistrimin e partive politike në KQZ, Miradije Mavriqi, duke iu referuar të dhënave të Panelit Zgjedhor për Ankesa dhe Parashtresa. Mavriqi thotë se me partitë parlamentare nuk ka problem, për shkak se borxhi i tyre u ndalet nga fondi për demokratizimin e partive politike.
“Ne nuk kemi konfirmim prej PZAP-it se ndonjë parti e ashtuquajtur e madhe ka borxhe të papaguara, mirëpo partitë të cilat kanë fituar vende në Kuvendin e Kosovës ato fitojnë nga fondi mjete. Kur ato kanë borxhe ne ua zbrezim atë borxh nga ai fond. Për atë edhe nuk mund të mbesin borxh”, deklaroi Mavriqi për Radio Kosovën.
Por, problem mbeten subjektet jashtë parlamentare dhe kandidatët e pavarur. Borxhi i përgjithshëm i tyre, sipas Mavriqit, është 40 mijë e 100 euro. Ajo thotë se Lidhja Demokratike e Dardanisë i ka ende borxh 9 mijë e 200 euro, kurse partia Fryma e Re, që tashmë është çregjistruar nga regjistri i partive politike ka një borxh prej 3 mijë e 50 euro. Sipas Mavriqit, janë edhe Partia Liberale e Kosovës dhe Partia Demokristiane për Integrim që ende kanë borxhe dhe disa iniciativa qytetare dhe kandidatë të pavarur, borxhet e të cilëve sillen nga 500 deri në 1000 euro.
Albert Krasniqi nga Instituti KIPRED thotë se Komisioni Qendror i Zgjedhjeve duhet të jetë më rigoroze në shqiptimin e dënimeve dhe certifikimin e partive politike.
“Kjo tregon një papërgjegjësi të madhe të partive politike për t’i përmbushur obligimet e ttyre që i kanë marrë me rastin e kandidimit. KQZ-ja duhet të jetë shuëm më rigoroze në shqiptimin e dënimeve dhe në moscertidfikimin e atyre partive që nuk i kanë shlyer të gjitha borxhet që i kanë ndaj këtij institucioni”, tha ai për Radio Kosovën.
Krasniqi thotë se me ligjet në fuqi që e rregullojnë legjislacionin për partitë politike, janë të parapara qartë dënimet dhe sanksionet dhe sipas tij, mjafton vetëm që ky legjislacion të respektohet nga ana e subjekteve politike.
Presidentja e vendit ka shpallur datën 3 nëntor për mbajtjen e zgjedhjeve lokale në Kosovë. Deri më tani, përveç një iniciative qytetare, asnjë subjekt tjetër politik nuk ka aplikuar për certifikim në KQZ. Afati për certifikimin e subjekteve politike është 4 shtatori.