Partia Demokratike e Kosovës (PDK) në Prizren ka akuzuar kandidatin e VV-së për kryeministër, Albin Kurtin se po e keqpërdorë kryetarin e Komunës, Mytaher Haskukën për afera korruptive.
Ish-drejtori i Urbanizmit nga ky subjekt politik, Visar Islamaj tha propozim-vendimi, për dhënien me koncesion të pronës publike komunale, operatorit ekonomik ka elemente korruptive.
“Këtij vendimi i ka paraprirë vizita e liderit të VV-së Albin Kurti, i cili me datë: 14.09.2019, ishte në Prizren, tek një operator ekonomik, të cilët u dakorduan që sot me datë: 25.09.2019, të hyj në rend dite propozimi për koncesionimin e pronës publike me operatorin, dhe dhënia e të ‘’drejtës’’ Mytaher Haskukës, të bëjë pazar me operatorin, me qëllim që të krijoj favore, për afera korruptive të udhëheqësve nga niveli qendror në bashkëpunim me nivelin lokal”, tha ai.
“Dega e PDK-së në Prizren, bashkë me grupin e ekspertëve, ka konstatuar, se ky propozim-vendim, nuk ka bazë juridike, por në vete përmban veti të korrupsionit dhe realizim të interesave të grupeve kriminale brenda VV-së”.
“ Është fat i keq, që qyteti i Prizrenit, qe dy vite, nuk ka një kryetar, që i realizon interesat e qytetarëve, për çka është zgjedhur, por i nënshtrohet fuqive madhore të urdhërdhënësve, të cilët e kanë zgjedhur për t’i shërbyer, në dëm të qytetarëve”.
“Propozim-vendimi i Mytës, bazë juridike, e ka kërkesën e oligarkut, ligjin për partneritet publiko-privat, ligjin mbi koncesionet, pa e specifikuar dispozitën juridike të këtyre dy ligjeve, dhe ligjin mbi dhënien në shfrytëzim të pronës publike komunale”.
“Që të tre ligjet e përmendura në preambulë të këtij propozim-vendimi, nuk e kanë një ndërlidhshmëri të dispozitave, që e rregullojnë materien në fjalë, dhe ne si parti, na len me kuptu, se ky përshkrim i ligjeve, është bërë me qëllim për të mjegulluar interesin, që fshehet pas këtij propozim-vendimi, me objektiva të bazuara korruptive”.
“Ligji mbi dhënien në shfrytëzim të pronës publike komunale, si kriter të domosdoshëm, e ka arsyshmërinë mbi interesin publik apo përfitimin ekonomik të komunës. Në këtë propozim-vendim, në asnjë rrethanë, nuk është përmendur interesi publik, por mbi të gjitha i shkel parimet bazë, duke cenuar konkurencën e lirë, që është e përcaktuar me nenin 15 dhe 16 të po këtij ligji, ku përmes mbylljes së konkurrencës, i jep hapësirë vetes, për të bërë pazare me pronën publike, sikur të ishte prona e tij private”.
“Partia Demokratike e Kosovës dega në Prizren, duke i parë veprimet kriminale, të njëpasnjëshme të Mytaher Haskukës, ditëve në vijim, do të përgatisë disa kallëzime penale, me qëllimin e vetëm, qe të mbrojë interesat e qytetarëve dhe të qytetit të Prizrenit”./PrizrenPress.com/