Sot është shënuar përmes një manifestimi përkujtimor edhe 18- vjetori i Betejës së Landovicës, ku janë nderuar 7 dëshmorët e rënë për liri dhe 15 martirë të këtij lokaliteti.
Para familjarëve të dëshmorëve dhe martirëve, veteranëve dhe invalidëve të luftës, bashkëvendësve dhe përfaqësuesve të institucionëve, ka folur përfaqësuesi i këtij lokaliteti, Fadil Berisha, i cili tha se “sot Landovica ka dhimbje, por edhe krenari për bijtë e vet, që me gjakun e tyre u flijuan për Lirinë e vendit”.
Edhe ish komandanti i UÇK-së nga ky lokalitet, Osman Qerreti, tha se kontributi i djemve trima të Landovicës në luftën çlirimtare ishte i jashtëzakonshëm në këto anë, karshi një armiku barbar dhe të paepur me gjak të shqiptarëve.
Në emër të komunës së Prizrenit, ka folur nënkryetari Lulzim Kabashi,i cili vlerësoi lartë traditën e atdhedashurisë që kultivuan banorët e Landovicës, e që u dëshmua edhe në luftën e fundit për Lirinë e Kosovës. Ish- komandanti i brigadës 125 të UÇK-së së ZOP-it, Nehat Basha, tha se amanetin e dëshmorëve do ta jetësojmë për një Kosovë siç e deshën ata, dhe nuk do të tolerojmë që të zhvlerësohen vlerat e atyre që u flijuan dhe sakrifikuan për çlirimin e vendit.
Para mbajtjes së tubimit përkujtimor, janë bërë homazhe dhe janë vendosur kurora lulesh në varrezat e dëshmorëve në Landovicë, ndërsa është mbajtur edhe një program i pasur artistik me këngë, valle dhe recitale, në kuadër të manifestimit përkujtimor që u mbajt në qendër të Landovicës./TV Prizreni/