Kryetari i Komunës së Prizrenit, Mytaher Haskuka, së bashku me zyrtarë komunalë, përfaqësues të shoqatave të dalura nga lufta, pjesëtarë të FSK-së dhe qytetarë të tjerë, sot kanë bërë homazhe pranë varrit, lapidarit dhe shtatores së heroit Remzi Ademaj – Komandant Petritit, me rastin e 21 vjetorit të rënies së tij.
Remzi Ademaj – Komandant Petriti shquhet si një ndër figurat më të dalluara të luftës së lavdishme të UÇK-së. Ai ka qenë komandant i zonës operative të Pashtrikut dhe komandant i parë i UÇK-së për rajonin e Prizreni. Krahas kontributit në luftë, ai ka qenë i angazhuar edhe në veprimtari të tjera të shumta që lidhen me çështjen kombëtare dhe emancipimin shoqëror.
Me rastin e përvjetorit të tij, kryetari Haskuka duke e kujtuar veprimtarinë e tij politike dhe patriotike tha se figura të tilla duhet të jenë shembull për gjeneratat e ardhshme.
Pas homazheve, me iniciativë të familjarëve dhe në bashkëpunim mes Komunës dhe shoqatave të dalura nga lufta, është bërë edhe aktiviteti për dhurimin e gjakut nga qytetarët vullnetarë, aktivitet ky i cili organizohet për herë të dytë rresht me rastin e përvjetorit të rënies së dëshmorit Remzi Ademaj. /PrizrenPress.com/