Komuna e Prizrenit ka njoftuar se praktika e buxhetimit me pjesëmarrje ka vazhduar me takimet në fshatrat Hoçë e Qytetit dhe Mushnikovë, në të cilat lokalitete banorët kanë votuar për projektet prioritare për komunitetin.
“Në kuadër të procesit të “Buxhetimit me Pjesëmarrje”, banorët e Hoçës së Qytetit dhe të Mushnikovës votuan për projektet që do të financohen nga Komuna e Prizrenit. Në Hoçë të Qytetit banorët votuan për “Ndërtimi i sallës sportive”. Ndërsa, në Mushnikovë, projekti i miratuar është “Renovimi-zgjerimi i objektit të Shtëpisë së Kulturës tek xhamia””, thuhet në njoftimin e Komunës së Prizrenit.
Zyrtarët komunalë janë zotuar se këto dy projekte do të realizohen me financim nga buxheti komunal.
“Këto projekte, që kanë ardhur si rezultat i kërkesave dhe propozimeve të qytetarëve, do të realizohen me mbështetje të plotë nga Komuna e Prizrenit, duke garantuar ndikim pozitiv në jetën e përditshme të komunitetit”, përfundon njoftimi.
