Aktori i mirënjohur shqiptar, Robert Ndrenika, pas problemeve shëndetësore me zemër, që e larguan nga shfaqja e Molierit në Tiranë, pritet t’i rikthehet teatrit në vjeshtë të këtij viti, në shfaqjen “Tartufi” të regjisorit Erion Kame.
Ndrenika është në Gjermani duke vëzhguar gjendjen shëndetësore, e cila sipas mediave shqiptare është duke u përmirësuar, prandaj Kame ka paraparë që edhe pse jo në premierë, Ndrenika të luajë rolin e Orogonit në reprizat e shfaqjes.
Ndrenika pritej të luante në premierën e 16 janarit, mirëpo një sëmundje e papritur ia pamundësoi pjesëmarrjen, me ç’rast edhe u shty premiera për në muajin maj.
Aktori së fundmi ka mbushur 73 vjet, mirëpo nuk e ka pushuar aktivitetin e tij artistik. Vitin e kaluar ai shkëlqeu në shfaqjen “Djemtë gazmorë”, në rolin e Uilli Klark. Ai ka interpretuar edhe shfaqje tjera të Molierit, si dhe disa prej shfaqjeve më të rëndësishme të teatrit dhe kinemasë në Shqipëri.