Adrian Çollaku
1.
Kryeministri i vendit, Isa Mustafa në postin e më të fuqishmit të vendit duket se po ndjehet shumë komod. Më nuk ka rëndësi për të se a është me PDK-në, apo me SHIK-un, e të dyja këto i akuzonte për çdo ditë se e kishin kapur çdo institucion, se po kontrollonin çdo pore të jetës, që e kontrollonin shtetin në çdo segment në të cilin merrej frymë.
E rëndësishme për të, tani duket të jetë akomodimi i vetvetes, dhe ruajtja e postit të të parit në parti, ku kundërshtarët politikë, po i lufton çdo ditë dhe në çdo formë…
Nëse Isa Mustafa nuk ka pasur dëshmi më herët se shteti mund të jetë kapur, ai tashmë ka edhe fakte.
2.
A thua si është ndjerë Isa Mustafa, pas skandalit të publikuar vetëm pak ditë më parë në medie se si PDK, së bashku me EULEX-in dhe me Bashkimin Evropian u munduan që në çdo formë ta prishnin koalicionin e arritur ndërmjet LDK-së, Vetëvendosjes, AAK-së dhe Nismës, përmes dënimit të Fatmir Limajt, jashtë çdo procedure dhe praktike gjyqësore?
Ka qenë e pritshme që Isa Mustafa nuk do ta thotë as edhe një fjalë për këtë skandal, pavarësisht pse qëllimi ka qenë që me çdo kusht të prishej Blloku LVAN, në krye të të cilit për më shumë se pesë muaj ka qëndruar vetë ai.
Është e pritshme që Mustafa nuk do ta flasë as edhe një fjalë për atë sesi po bllokohet emërimi i Kryeprokurorit të shtetit të Kosovës- sepse krejt qarshia flet për atë që ai post i është ndarë tashmë “babës” dhe tërë “ngërçi” po ngjet për këtë shkak! Poashtu është e pritshme që ai më nuk do ta thotë asnjë fjalë se edhe drejtësia në Kosovë është e kapur, siç na e thoshte sa ishte kryetar i Prishtinës dhe sa ishte në krye të LVAN-it.
3.
Mirëpo, mund të shtrohet dilema nëse vetë kryeministri Isa Mustafa qenka i kapur. Mund të jetë shumë logjike shtrimi i kësaj dileme, nëse e kemi parasysh faktin se si ai brenda një nate ndërroi qëndrim dhe iu bashkua koalicionit me PDK-në.
Se si nga hyrja me PDK-në qëndrimet e tij ndaj Hashim Thaçit dhe SHIK-ut ndërruan për 180 shkallë. Madje, është sa qesharake, aq e dhimbshme deklarata që e kishte dhënë menjëherë pas hyrjes me PDK-në, kur tha se ka parë “vullnet te Hashim Thaçi për luftimin e korrupsionit”.
Është shumë e dyshimtë se si në planin qeverisës të Isa Mustafës nuk thuhet thuajse asnjë fjalë për luftimin e korrupsionit dhe të krimit të organizuar. Thjeshtë nuk janë prioritet për qeverinë e tij, këto dy fenomene shqetësuese, që e kanë sjellë Kosovën në këtë derexhe, ku qytetarët duket se më nuk kanë as shpresa, përpos Hungarisë.
Kryeministrin Isa Mustafa s’po e pyet kush as për drejtorë e as për sekretarë të përgjithshëm, e madje as për thuajse asgjë… Thjesht shtrohet pyetja se a është Isa Mustafa kryeministër, apo kush është? Apo po del që Isa Mustafa është vërtetë i kapur!
Edhe nëse Isa Mustafa nuk e ka guximin ta thotë që është kapur, veprimet e tij po e dëshmojnë këtë çdo ditë e më tepër.
Qofsha gabim, mirëpo, kapja duket se brina s’ka.