Në orët e para të mëngjesit Policia e Tiranës ka zhvilluar një operacion blic, për gjetjen e Vladimir Gjutës, person i shpallur në kërkim për vendosjen e eksplozivit tek farmacia e babait të Ministrit të Brendshëm, Saimir Tahiri.
Për momentin Gjuta dhe nipi i tij, Baftjar Bruka, janë dy nga njerëzit më të kërkuar nga Shqipëria.
Policia kreu një kontroll të himtësishëm në vilën “Gjuta”, në Rrugën e Elbasanit, në pronësi të Vladimir Gjutës.
Vladimir Gjuta vlerësohet si drejtuesi kryesor i një grupi që ndërtonte bomba me eksploziv dhe është shpallur në kërkim që prej muajit shkurt të këtij viti.
Kontrollet e imtësishme u kryen nga forcat e Drejtorisë së policisë së Tiranës, forcat “Shqiponja” si dhe njësia operacionale e Drejtorisë së Policisë së Tiranës.
Nga informacionet rezulton se personi i shpallur në kërkim nuk ndodhej në objektin e tij gjatë kontrollit, duke rezultuar ende person në kërkim.
Ndërkohë para pak ditësh, mediat italiane raportuan se Bruka mund të jetë pjesë e një grupi xhihadist, që po organizon sulme terroriste në Itali.
Bruka thuhet se ka aftësi të mira në fushën e eksplozivëve.
Mendohet se Bruka operon në zonën e Firences.