Policia në Prizren, ka nisur sot hetimet për blerjen e votës në këtë qytet. Hetimet kanë filluar pas ngritjes së shqetësimit të kandidatit të Vetëvendosjes për kryetar të Prizrenit, Arbër Rexhaj.
Kandidati Rexhaj është ftuar nga policia që të japë informacione shtesë për këtë qëllim. “Përshëndes gatishmërinë e organeve të rendit për të mos lejuar asnjë formë që do ta dëmtonte procesin zgjedhor”, tha Rexhaj për “PrizrenPress”.
Ai tha se vetëm më një veprim të përbashkët shoqëror dhe institucional mund të arrijmë deri tek sigurimi i një procesi të drejtë zgjedhor.“Lëvizja Vetëvendosje! në Prizren është tejet e përkushtuar që vullneti i qytetarëve për ndryshim të mos degradohet në asnjë formë. Prandaj inkurajojmë të gjithë qytetarët që rastet e tilla t’i paraqesin menjëherë në organet e rendit dhe drejtësisë, sepse përgjegjësia për sigurimin e një procesi të drejtë zgjedhor është përgjegjësi publike dhe kolektive. Ne jemi të bindur se rruga jonë e drejtë do të na qoj drejtë suksesit dhe fitores tonë të përbashkët me qytetarët e Prizrenit”, tha Rexhaj./PrizrenPress.com/