Iniciativa Qytetare për Malishevë, akuzon kryetarin e Komunës, Isni Kilaj për tentim të përvetësimit të projekteve që janë realizuara nga ish- Ministri i MTPT-së Fatmir Limaj. “Disa prej projekteve të kryera që Kilaj i konsideron të tijat si:shkolla profesionale, salla e sportit,shtëpia e kulturës disa rrugë etj. janë investime të Qeverisë Qendrore dhe Shtetit të Norvegjisë e që meritor për këto projekte është Fatmir Limaj ish- Ministër i MTPT-së në atë kohë”, thuhet në komunikatën e IQPM.
Sipas IQPM-së, Kilaj po bënë përpjekjet e fundit t’iu qet “hi syve” qytetarëve me disa deklarata publike, duke lavdëruar qeverisjen e tij, të cilat janë kryesisht deklarata për fushat zgjedhore. “Nëse e shikojmë këtë deklaratë me një fotografi të kompletuar me gjithë stafin e tij qeverisës, vërtet do të krijohej përshtypja se ashtu ka qenë edhe bashkëpunimi i tyre, por z. Kilaj gjatë qeverisjes së tij asnjëherë për asgjë nuk e ka marrë mendimin e asnjërit prej këtyre drejtorëve se si të qeveriset”.
Iniciativa Qytetare për Malishevë vlerëson se Kilaj vendimet e tij i ka marrë me disa njerëz që nuk i njeh qytetari i Malishevës, dhe që nuk kanë qenë zyrtarë të qeverisjes Komunale. “Ata kanë qenë pjesë e qeverisjes paralele jo legjitime me atë zyrtare”.
Kryetari Kilaj, sipas kësaj iniciative asnjëherë nuk ka pyetur as përfaqësuesit legjitim të fshatrave për nevojat dhe kërkesat e tyre. “A ka vendosur çdo herë vetëm me grupin e tij, jo legjitim se ku të investojë dhe kujt të ia besoj punën me tender”.
IQPM po ashtu demanton deklaratën e Kilaj se anoj zyrtar i Komunës së Malishevës nuk ka dosje në hetuesi. “Dosjet janë në hetuesi për vet Kilajn, që nuk dëshirojmë t’i bëjmë publike, sepse është çështje që i’u takon krimeve ekonomike”./PrizrenPress.com/