“Unë besoj se prokurori i parë që do të marrë këtë hap të guximshëm, do të bëhet hero shpirtëror i popullit të Kosovës, sepse pa një prokuror të vendosur dhe të përkushtuar për të vënë në praktikë sundimin e ligjit, shpresa e qytetarëve nuk do të rikthehet. Në momentin kur prokurorë të guximshëm do të marrin hapin e parë, ne do të jemi dëshmitarë se si kthehet shpresa dhe besimi i qytetarëve, se më në fund Kosova doli në dritën e perspektivës, ku do të sundojë ligji dhe shteti i së drejtës për të gjithë njësoj, shprehet analisti Shefqet Dibrani
Është koha dhe momenti i fundit që Prokuroria e shtetit të Kosovës të veprojë në luftën kundër korrupsionit, posaçërisht te njerëzit e politikës dhe parapolitikës, që e kanë zaptuar pushtetin në Kosovë. Vetëm një Prokurori e vendosur dhe e përkushtuar për sundimin e ligjit me prokurorë të guximshëm, mund t’ua kthejnë shpresën e besimin e humbur të gjithë qytetarëve se më në fund do të kthehet sundimi i ligji dhe shteti i së drejtës për gjithkënd, që e shkel ligjin. Qytetarët kanë shpresë se Gjykata Speciale Ndërkombëtare do të mund që shumë shpejt politikanët e korruptuar dhe inkriminuar t’i largojë nga skena politike dhe nga të gjitha institucionet e shtetit. Analisti politik, Shefqet Dibrani, thotë se tanimë janë pjekur kushtet për të vepruar Prokuroria e shtetit.
“E rëndësishme është të fillojë diku, sepse të gjitha rastet për një ditë nuk mund të gjykohen. Politika dhe parapolitika, si dhe njerëzit nëpër borde e institucione përkatëse janë përgjegjës për këtë gjendje. Nëse drejtësia do të punojë në mënyrë selektive, do të presim gjatë, por ndoshta pse jam idealist ushtroj besimin se Kosova ka njerëz të devotshëm, të cilët nuk janë të implikuar në afera korruptive, e po ashtu besoj se ka edhe kuadër të aftë dhe profesional. Guximi për të vepruar si duhet lidhet me konjukturat pushtetit, i cili hëpërhë kontrollon çdo gjë, veçmas drejtësinë”, shprehet Dibrani.
Ai thotë se viti 2016 do të jetë vit i Kosovës, ku, sipas tij, do të shfaqen prokurorë që do të guxojnë të përballen me sfidat që ka Kosova. “Siç janë deklaruar edhe ndërkombëtaret, krimi dhe korrupsioni luftohet me prangosje, por jo me fjalë të mira. Unë besoj se prokurori i parë që do të marrë këtë hap të guximshëm, do të bëhet hero shpirtëror i popullit të Kosovës, sepse pa një prokuror të vendosur dhe të përkushtuar për të vënë në praktikë sundimin e ligjit, shpresa e qytetarëve nuk do të rikthehet. Në momentin kur prokurorë të guximshëm do të marrin hapin e parë, ne do të jemi dëshmitarë se si kthehet shpresa dhe besimi i qytetarëve, se më në fund Kosova doli në dritën e perspektivës, ku do të sundojë ligji dhe shteti i së drejtës për të gjithë njësoj, pa marrë parasysh nëse është i veshur me petkun shtetëror apo qytetar i rëndomtë”, thotë ai../kosova sot/