Sado që në retorikën e tyre i dëgjojmë partitë politike si nga pozita, po ashtu edhe nga opozita se janë për fuqizim të shtetit, pavarësisht përçarjeve që kanë, ato në fakt nuk bëhen bashkë, kur është fjala për interesin e vendit dhe të qytetarëve. Kjo klasë politike nuk ulet së bashku, të tejkalojë dallimet për të bërë një reformë në drejtësi, e cila përfundimisht do ta pastronte drejtësinë nga të korruptuarit,shkruan gazeta Kosova Sot.
Se janë këto vetëm deklarime mashtruese për opinionin publik të painformuar sa duhet, nga fakti që askush nuk po e merr iniciativën me kalendar dhe agjendë konkrete për këtë reformë, e nxjerrin si një përfundim real analitik edhe analistët e fushës së politikës dhe sundimit të ligjit. Sipas tyre, kjo lojë për publikun që vjen qoftë nga pozita, apo edhe nga opozita, nënkupton qartë frikën e të dyja palëve si nga njerëzit e pozitës, ashtu edhe ata të opozitës për ta sjellë një drejtësi të pastër, ngase të dy palët ushqehen e mbahen nga oligarkia e inkriminuar, korruptuese dhe kriminale, që është shtrirë gjithandej në institucionet e Kosovës.
Pushteti frikësohet se i humb privilegjet
Analisti politik, Florim Zeqa, i tha gazetës se pavarësisht kundërthënieve dhe raporteve të “acaruara” që kanë, pozita dhe opozita ishte dashur të ulen së bashku, për të hartuar një strategji të qartë veprimi për reformimin e sistemit të drejtësisë, mirëpo arsyeja e qasjes joserioze e subjekteve politike ndaj sistemit të drejtësisë në vend, është tek fakti se liderët e partive politike pushtetare dhe atyre opozitare, së bashku me klanet e tyre, ushqehen dhe mbahen nga oligarkia e inkriminuar, e korruptuar, e shantazhuar dhe kriminalizuar në sistemin e drejtësisë së kapur nga lidhjet e tyre kriminale.
Ai vlerëson se vetëm ndërrimi gjeneral i kësaj klase politike ngjall shpresën edhe për reformën e thellë në drejtësi. “Nga frika e humbjes së privilegjeve pushtetore dhe ruajtjes së sferave të interesit përmes zinxhirit korruptiv, liderët partiakë, përveç deklarimeve për konsum të brendshëm partiak, nuk mund të shkojnë tutje me iniciativat për reformimin e sistemit të drejtësisë. Madje, është iluzive vetëm të mendohet, që me këtë klasë politike kaq të papërgjegjshme, të korruptuar dhe shantazhuar të realizohet ndonjë lloj reformimi substancial në sistemin e drejtësisë. Prandaj, reformat në sistemin e drejtësisë janë të mundshme të arrihen vetëm me një klasë të re politike, të guximshme, me përkushtim dhe dashuri ndaj atdheut dhe së ardhmes prosperuese të Republikës së Kosovës”, u shpreh analisti Florim Zeqa për “Kosova Sot”