Prizrenasit deri tash kanë paraqitur për legalizim vetëm një të tretën e objekteve ilegale sa vlerësohet të ketë kjo qendër. Sipas të dhënave zyrtare të Drejtorisë për Urbanizëm janë dorëzuar rreth 10 mijë aplikacione, derisa numri i objekteve pa leje në territorin e komunës kap shifrat e rreth 30 mijë ndërtimeve.
Për të përballuar numrin e aplikimeve në kuadër të sektorit të urbanizimit në Komunën e Prizrenit është formuar një Task Forcë, që vazhdimisht pranon dokumentacion, por duket se pjesa më e madhe e tyre janë vetëm në qytet dhe lagja periferike “Arbana”, ndërsa pak sosh janë nga fshatrat, ndonëse edhe ato përfshihen në projekt.
Projekti i legalizimit që përfshin shtëpitë dhe lokalet afariste, të ndërtuara deri në fund të gushtit të vitit 2013 kryhet mbështetur në Ligjin për Trajtimin e Ndërtimeve Pa Leje, të Ministrisë për Mjedis dhe Planifikim Hapësinor, miratuar më 2013. Në Prizren ka nisur në fillim të muajit nëntor./zeri/