Gjykata Themelore në Prizren i ka caktuar masën e paraburgimit prej një muaji të pandehurit A.Q. që dyshohet se kishte rrahur bashkëshorten e tij për shkak të televizorit.
Siç thuhet në njoftim të gjykatës, i pandehuri, më 15 prill, në orët e mesditës për shkak të mosmarrëveshjeve me bashkëshorten rreth televizorit, e kishte sulmuar me grushte në pjesë të ndryshme të trupit duke i shkaktuar lëndime të rënda trupore.
Kjo gjykatë ka caktuar masën e paraburgimit duke thënë se ka marrë parasysh edhe deklarimin e të dëmtuarës që ka thënë se i pandehuri kishte ushtruar dhunë ndaj saj edhe në të kaluarën.
“Andaj, nga të lartcekurat Gjykata ka ardhur në përfundim se në rastin konkret caktimi i paraburgimit është i ligjshëm dhe i domosdoshëm, pasi që në rastin konkret kemi të bëjmë me veprën penale të lëndimit të rëndë trupor ku viktimë është personi i ndjeshëm dhe i pandehuri është në marrëdhënie familjare, me të cilën vepër penale kanoset apo dëmtohet integriteti trupor i njeriut si një nga të drejtat elementare e fondamentale, sipas mendimit të gjykatës caktimi i masës së paraburgimit tani për tani është i domosdoshëm dhe i arsyeshëm”, thuhet në njoftim.