Kryetari i Komunës së Prizrenit, Mytaher Haskuka, sot së bashku me kryeministrin e Kosovës Albin Kurti përuruan projektin e Qendrës me një Ndalesë (“One Stop Shop”), i cili u realizua nga ana e Komunës së Prizrenit dhe Ministrisë së Administratës Publike që tashmë është e integruar në Ministrinë e Brendshme.
Gjatë kësaj ceremonie, kryeministri Kurti shprehu se Prizreni është shembull për ofrimin e shërbimeve të shumta në të njëjtën hapësirë, duke ia kursyer qytetarit edhe kohën edhe paratë.
Duke shprehur se “Komuna është e përbashkëta jonë”, kryeministri Kurti theksoi se ky projekt që u realizua në Prizren, si askund tjetër, u bë edhe shembull për komunat tjera, e edhe për qeverinë dhe shtetin.
Në një fjalë rasti kryetari Haskuka falënderoi të gjithë ata që kontribuuan në realizimin e këtij projekti, ndërkaq shtoi se me 56 sportele në katin e parë të Administratës Komunale, do të ofrohen shërbime të shumta për qytetarë, në standarde të larta, në një ambient modern e të digjitalizuar.
Kryetari Haskuka po ashtu njoftoi se për reformimin e shërbimeve të administratës publike, së bashku me Bankën Botërore dhe IFC-në, është bërë analizimi i 190 shërbimeve publike të ofruara në Komunën e Prizrenit, ku më shumë se 60% të tyre janë thjeshtësuar.
Ndërkaq drejtori i Drejtorisë së Administratës në Komunën e Prizrenit, Osman Hajdari falënderoi qytetarët për mirëkuptimin e treguar gjatë periudhës së implementimit të projektit, ku shërbimet u rilokuan në disa pika të tjera.
Në këtë ceremoni të pranishëm ishin edhe ministrja e Administrimit të Pushtetit Lokal Emilija Redzepi, deputetë të Kuvendit të Kosovës, zyrtarët komunalë dhe qytetarë të Prizrenit.