Rreshteri i Policisë së Kosovës, Nuredin Begolli, i akuzuar për nxjerrjen e informatës zyrtare, të martën, ka kërkuar që të hudhet poshtë aktakuza kundër tij. Në shqyrtimin e dytë, të mbajtur në Gjykatën Themelore në Prizren, mbrojtësi i të akuzuarit, avokati Hajrip Krasniqi, ka qëndruar pranë kërkesës me shkrim për hudhjen e aktakuzës, të cilën e kishte deponuar në gjykatë.
Krasniqi ka thënë se dëshmitarët janë marrë në pyetje në prokurori pa prezencën e mbrojtjes dhe se A. K, ka deklaruar në prokurori se nuk i ka marrë informatat nga i akuzuari. E njëjta ka shtuar edhe se me të dëmtuarin Deli Hoxha, nuk ka pasur asnjë lidhje.
Andaj sipas Krasniqit, nuk kanë bazë pretendimet e prokurorisë se i mbrojturi i tij i ka dhënë informata A.K., të cilat kanë ndikuar në prishjen e marrëdhënieve në mes saj dhe të dëmtuarit në këtë rast, Deli Hoxha.
Prokurori i çështjes, Genc Nixha, ka kërkuar që të refuzohet kërkesa e mbrojtjes për hudhjen e aktakuzës, si e pabazë.Kryetarja e trupit gjykues, Raime Elezi, ka njoftuar palët se në lidhje më kërkesën e mbrojtjes do të vendosë me vendim me shkrim.
Nuredin Begolli akuzohet se në cilësinë e zyrtarit policor, ka zbuluar informatën zyrtare për personin tjetër, duke i dhënë atij një përparësi që nuk i takon.Sipas aktakuzës, Begolli ka njoftuar qytetaren A. K., për numrin e veprave penale dhe të kundërvajtjes, të kryera nga qytetari Deli Hoxha, e i cili informacion, ka ndikuar në prishjen e raporteve në mes këtyre dy personave.