Në Kosovë është ndërtuar kultura hipokrite e të mbajturit të pushtetit me të gjitha mjetet, qoftë me gënjeshtra e mashtrime, premtime të pambajtura, siç është instaluar edhe kultura e ardhjes në pushtet, po kështu me të gjitha mjetet.
Nuk mund të shpjegohet ndryshe barrikada e këtij pushteti për të mos ofruar alternativën e të shkuarit në zgjedhje të parakohshme për interesa të vendit, kur shihet se ky koalicion tashmë është pa legjitimitet. Këtë e tregojnë anketat e UNPD-së për besimin jashtëzakonisht të vogël të qytetarëve ndaj kësaj Qeverie mashtruese. Duket se këta politikanë janë në gjendje ta shkatërrojnë shtetin, e të mos heqin dorë nga privilegjet e pushtetit dhe kolltukut të butë.
Mirëpo, qytetarët si duket janë vetëdijesuar më në fund që këta pushtetarë t’i dënojnë me votë, meqë ata ia shkaktuan një bllokadë 6-muajshe dhe po kështu edhe për një vit të qeverisjes i kanë sjellë dëme të mëdha qytetarëve.
Analisti Ragip Guraziu mendon se e tërë kjo po ndodh, për shkak se shteti është i kapur dhe kjo nuk gjendje nuk do të ndryshojë me këtë pushtet të korruptuar. “Shteti i kapur s’ka si të veprojë ndryshe. Tani gjendemi para një barrikade që po e izolon vendin. Nuk janë të aftë as pozita e as opozita për të biseduar dhe për të gjetur alternativat e daljes nga kjo gjendje”, shprehet ai../kosova sot/