Objekti i Qendrës Kulturore e Sportive në Mushnikovë është në ndërtim e sipër që nga viti 2011.
Ende nuk ka as kulm, ndërkohë që finalizimi i punimeve nuk duket të jetë afër. Zyrtarët përgjegjës komunalë kanë theksuar se faza përfundimtare e ndërtimit të objektit do të realizohet pas sigurimit të mjeteve shtesë për këtë projekt, që duhet të ndodhë me miratimin e rishikimit të buxhetit nga Kuvendi i Kosovës, shkruan Koha Ditore.
Ndërkohë përfaqësues të fshatit kanë bërë thirrje që së paku të vendoset kulmi i objektit në mënyrë që struktura e ndërtesës të mos pësojë dëme.
Mirëpo, drejtori i Kulturës e i Sportit në Komunën e Prizrenit, Arhim Ajazi, ka pranuar se duhen mjeteve shtesë për fazën përfundimtare të projektit. Sipas tij, deri më tani për këtë projekt janë shpenzuar 126 mijë euro nga buxheti komunal dhe nevojiten edhe 48 mijë euro për fazën e tretë.