Shkruan: Astrit Ahmeti
Kosova si një vend në tranzicion, pas luftës së fundit, po përballet ende me probleme të shumta ekonomike e sociale.
Me një numër shumë të madh të të papunëve, që sipas institucioneve të Republikës së Kosovës (Agjencia e Statistikave të Kosovës) sillet rreth 44 %, por nëse marrim parasysh një numer të qytetarëve që nuk paraqiten në entet e punësimit, ateherë kjo përqindje mund të jetë edhe më e madhe, varfëria është produkt i kësaj papunësie, ku një pjesë e qytetarëve jetojnë me me pak se 0.1 euro në ditë, që do të thotë se ata jetojnë në varfëri ekstreme.
Po sa po mendon shteti për këtë kategori, dhe sa janë gjasat që të ndryshohet kjo gjendje?
Shteti i Kosovës me kapacitetet që ka duhet të mendoj me projekte konkrete në zvogëlimin e numrit të papunësisë, duke investuar në ato dikastere që mund më së shpejti të sjellin përfitime dhe vende të reja të punës.
Si dikaster që mund të ndikojë në zvogëlimin e numrit të të papunëve është padyshim bujqësia ku Qeveria e Kosovës veçse ka filluar me investime, duke përkrahur bujqit me subvencione, por mbeshtetja duhet të jetë shumë më e madhe, duke siguruar kushte me të mira të tregut për bujqit dhe duke investuar në hapjen e fabrikave të reja në menyrë që të vijmë deri tek reduktimi i papunësisë.
Dihet që Kosova ka tokë pjellore që nuk e shfrytëzon, përkundrazi kjo tokë po keqshfrytëzohet për ndertime të larta, përderisa ne importojmë drithera e produkte që mund të sigurohen nga kjo tokë.
Një problem mjaft i madh që po shkon duke u rritur çdo ditë është papunësia e të rinjve të cilet edhe pas diplomimit të tyre nuk arrijnë të punësohen, e për të eliminuar këtë shteti duhet të zvogëlojë numrin e studentëve të pranuar në studime universitare, duke hapur Shkolla të reja profesionale dhe duke përkrahur bizneset e reja tregtare e shërbyese.
Qeveria e Kosovës me vendimet e fundit për rritje pagash të shumë kategorive si dhe uljen e pagesave të studentëve, ka dhënë shenja që ky shtet po shkon kah krijimi i një shteti të mirëqenies sociale, por ende mbetet shumë për të punuar, jemi vetem në fillim të rrugës, dhe përpos rritjes së pagave duhet të punohet shumë më shumë në hapjen e vendeve të reja të punës.
Qeveria e ardhshme e Kosovës që do të dale pas zgjedhjeve që do të mbahen këtë vit, duhet të orientohet në këtë drejtim në zvogëlimin e numrit të të papunëve, zgovëlimin e varfërisë në Kosovë dhe krijimin e një shteti social që mendon për kategoritë në nevojë.