Pasi që më 10 shtator vendosën firmat e tyre në “Marrëveshjen e parimeve” për zgjedhjen e kryetarit të Kuvendit, Lëvizja Vetëvendosje nuk është e sigurt nëse kjo marrëveshje mund të vlejë edhe për votimin e “Qeverisë Haradinaj”, të propozuar nga Blloku LDK-AAK-Nisma.
Pikërisht për këtë pasiguri të tyre, subjekti i Albin Kurtit do të bëjë një referendum të brendshëm me anë të të cilit do të pyetet anëtarësia: se a do të bëhen pjesë apo jo e kësaj qeverie? Një vendim i tillë, pas marrëveshjes së arritur me LAN-in, nga pjesëtarë të shoqërisë civile po konsiderohet si i vonuar. Ata vlerësojnë se me anë të referendumit krerët e Vetëvendosjes po synojnë vetëm ta zbusë kritikën që ka “shpërthyer” brenda partisë pas marrëveshjes me LAN-in.
Analisti politik Fisnik Korenica në një prononcim dhënë gazetës ka thënë se vendimi i lidershipit dhe i liderit të saj për të nënshkruar marrëveshje me LAN tashmë nuk mund të kontestohet nga anëtarësia e Vetëvendosjes. /Tribuna