Kandidati i Lëvizjes Vetëvendosje! për kryetar të Prizrenit, Arbër Rexhaj është takuar me të rinjtë e fshatit Mushnikovë të Prizrenit. Në këtë takim është folur për rëndësinë e pjesëmarrjes dhe angazhimin e të rinjve në proceset e rëndësishme që po kalon vendi.
“Si pjesa më vitale e shoqërisë, të rinjtë në vazhdimësi kanë qenë katalizator i ndryshimeve politike dhe shoqërore gjatë gjithë historisë sonë. Forca krijuese, vullneti dhe guximi i gjeneratës së re janë faktorët që përherë i kanë paraprirë ngjarjeve të mëdha, dhe tani është koha që potenciali i pashtershëm i kësaj kategorie të orientohet përsëri në synimet për ndryshime shoqërore-politike në vend”, tha Rexhaj.
Sipas tij, politika e vjetër shembet vetëm atëherë kur asaj i kundërvihen forcat e reja me ide të reja. “Prandaj edhe angazhimi politik për ndryshim asnjëherë nuk mirëpritet nga pushtetet e padrejta. Sepse brezi i ri çdoherë shemb të vjetrën e padrejtë. Kjo është edhe arsyeja se pse Lëvizja VETËVENDOSJE! është forca e vetme politike që mund ta bëjë këtë ndryshim të nevojshëm”, tha Rexhaj./PrizrenPress.com/