Kryetari i Komunës së Prizrenit, Mytaher Haskuka, sot së bashku me drejtorin e Drejtorisë së Urbanizmit dhe Planifikimit Hapësinor, Beni Kizolli vizituan banesat kolektive, ku janë realizuar punimet për rinovimin e kulmeve dhe ku kanë filluar punimet për lyerjen e korridoreve.
Me këtë rast kryetari Haskuka bëri të ditur se tanimë janë përmbyllur punimet për rehabilitimin dhe rinovimin e 4 kulmeve për përfituesit e vitit të kaluar dhe se kanë filluar punimet për rregullimin edhe të 12 kulmeve të tjera për përfituesit e këtij viti.
“Këto punime, sipas planit dinamik, do të përfundojnë deri në fund të vitit dhe kështu do të arrijmë që gjatë mandatit të rregullojmë kulmet e 34 banesave kolektive, për rreth 474 njësi banesore”, njoftoi kryetari Haskuka.
Në anën tjetër, drejtori i DBZHR-së, Kizolli njoftoi se përveç rinovimit të kulmeve, banorët e banesave kolektive po mbështeten edhe me lyerjen e korridoreve. Duke bërë të ditur se deri më tani janë pranuar 9 kërkesa, drejtori Kizolli informoi se po vazhdojnë aplikimet për të përfituar nga ky projekt.
“Ftoj gjithë qytetarët e interesuar që t’i drejtohen DBZHR-së, në mënyrë që të përfitojnë nga ky projekt, për të cilin mund të ofrojmë mbështetje për 50 banesa, duke e realizuar me participim të banorëve”, tha Kizolli.
