Një femër ka kërkuar ndihmën e policisë në fshatin Xërxë të Rahovecit. Ajo dyshohet se është rrahur nga i dyshuari B.Th. në restorantin “Mërgimi” në Xërxë.
“Rreth orës 06:00 të mëngjesit, një patrullë e Policisë nga Rahaveci, e cila po patrullonte në rrugën magjistrale Prizren-Gjakovë, ka hasur një femër, e cila ishte e lënduar dhe ka kërkuar ndihmë”, tha Zëdhënësi i PK në Prizren, Hazir Berisha.
“Viktimën policia e ka dërguar për ndihmë mjekësore në Shtëpinë e Shëndetit në Rahavec, kurse më pas në Spitalin Rajonal të Gjakovës për trajtim mjekësor”.
“Pas një hetimi fillestar, është bërë e ditur se viktima, e cila ishte e punësuar në restorantin “MERGIMI” në Xërxë, për arsye ende të panjohura ishte rrahur gjatë natës nga i dyshuari B. TH. dhe ishte mbyllur në një dhomë të restorantit”.
“Më pas viktima ka ikur nga restoranti nëpër dritare të dhomës, duke u lëshuar me çarçaf krevati”.
“Policia e ka arrestuar të dyshuarin i cili po mbahet nën masën e arrestit policor me urdhër të prokurorit të shtetit. Hetues policorë po punojnë për zbardhjen e rrethanave të rastit”. /PrizrenPress.com/