Kryetari i Komunës së Suharekës, nga radhët e LDK-së, Sali Asllanaj, me gjasë nuk është i pajtimit me vendimin e kryesisë së partisë për hyrje në koalicion me AAK-në dhe Nisma-në si dhe me faktin se ky koalicion e ka përzgjedhur për kryeministër Ramush Haradinaj.
Asllanaj, në një intervistë për portalin lokal të Suharekës , Theranda Post, ndër të tjera për zhvillimet qendrore politike tha: “Janë zhvillime për faqe të zezë. Sinqerisht këto reflektojnë shumë në nivelin komunal, por aty më shumë është duke u biseduar për pozicione dhe benefite të njerëzve në Qeveri se sa për interesin publik.”
Më poshtë pyetja e gazetarit dhe përgjigja e Asllanaj, lidhur me këtë qështje.
Theranda Post: Ka rivalitete të politikës lokale LDK dhe AAK, dhe po na intereson një prononcim i juaji edhe pse jeni antar mjaft me peshë e rëndësi në qendër të LDK-së, si i komentoni zhvillimet qendrore politike?
Sali Asllanaj: Janë zhvillime për faqe të zezë. Sinqerisht këto reflektojnë shumë në nivelin komunal, por aty më shumë është duke u biseduar për pozicione dhe benefite të njerëzve në Qeveri se sa për interesin publik. Në këto raste gjithmonë më kujtohet një gjerman që thoshte “Gjermania mbi të gjitha” , ata kanë ditë të mendojnë që Gjermania të jetë mbi të gjitha dhe këtu te ne të jetë Kosova mbi të gjitha por këtu tek ne e kemi kush po bëhet kryeministër pa pretendu që do të zgjidhet problemi, por kush do të bëhet dhe me inate të larta personale ndaj njëri-tjetrit. Është për të ardhur keq që është kështu. Por nuk mundemi që ne prej Suharekës të zgjidhim të gjitha problemet atje. Totalisht tjetër mendim kam pasur unë në kryesi dhe krejt tjetër mendim kanë vendosur ata atje. Ta shohim si do të zgjidhet ky lëmsh, gjithsesi humbësi më i madh është Kosova dhe qytetari i saj që me problemet e tij askush nuk po merret.