Ish-Presidenti i Kosovës dhe kryetari i LDK-së, Fatmir Sejdiu, është dukur në “territorin” e Eqrem Kryeziut.
Ai është takuar dhe pirë kafe sot në sheshin “Shatërvan” të Prizrenit, me kundërshtarët e Kryeziut. Anëtari i LDK-së në Zhur, Nijazi Ademaj ka pranuar se ka pirë kafe me Sejdiun. Ai, ndërkaq, ka mohuar se në këtë takim është biseduar për problemet politike të LDK-së.
“Rastësisht jam takuar me Sejdiun. Ishte një kënaqësi e imja që të takoj ish-Presidentin Sejdiu”, tha Ademaj për “PrizrenPress”.
LDK-ja në Prizren, pas humbjes së zgjedhjeve të nëntorit të vitit të kaluar, është bërë “pikë e pestë”.
Nëndegët e këtij subjekti politik kanë bërë edhe peticion për largimin e Eqrem Kryeziut nga posti i kryetarit të Degës së LDK-së në Prizren. Njëri prej tyre që ka kërkuar largimin e Kryeziut është edhe Nijazi Ademaj.
“Nuk kemi biseduar për problemet e partisë. Thjeshtë ka qenë takim i rastësishëm”, tha Ademaj./PrizrenPress.com/