Zëvendësministri i Punëve të Jashtme të Kosovës, Petrit Selimi ka deklaruar se kryeministri serb, Ivica Daçiq pasi është i lindur në Kosovës është edhe qytetar i Kosovës dhe mund të votoj në zgjedhje lokale në Prizren nëse figuron në listën e votuesve kosovar.
“Në parim, Ivica Daçiq është qytetar u Kosovës sipas asaj që ai është i lindur këtu. Nëse figuron në listën e votuesve kosovar, mund të votoj në vendin ku ka lindur apo ku është regjistruar, respektivisht në Prizren, me çka do t’i jepte kuptim parimit të llojshmërisë në njërin nga qytetet më të bukur në Kosovë dhe Ballkan”, ka thënë Selimi për Danas,transmeton Orainfo.
Ai ka shtuar se zgjedhjet për herë të parë organizohen në tërë Kosovën, duke përfshirë edhe komunat në veri.
“Për herë të parë kemi angazhim të plotë të Kosovës, BE-së dhe Serbisë që votimet të mbahet në tërë Kosovën, në pajtim me ligjet zgjedhore të Kosovës, për një trup që do të funksionoj në kuadër të sistemit kushtetues të Kosovës. Ky mund të jetë momenti kryesor në stabilizimin e marrëdhënieve në Ballkan”, ka thënë Selimi.