Ambasada e Shteteve të Bashkuara në Prishtinë e ka mirëpritur kalimin nga ana e Qeverisë të amandamenteve kushtetuese, që janë të nevojshme për themelimin e Gjykatës Speciale.
Në njoftimin për media të Ambasadës së Shteteve të Bashkuara, theksohet se “ky është një hap i rëndësishëm drejt përmbushjes së zotimeve që Kosova i ka bërë në prill të vitit 2014, me rastin e Shkëmbimit të Letrave me BE-në”.
Po ashtu, në deklaratë theksohet se ky zhvillim “tregon gatishmërinë e Kosovës për të adresuar akuzat kundër individëve nga raporti i vitit 2011 i Këshillit të Evropës”.
“Përpjekjet e qeverisë do t’i mundësojnë Kosovës që të ecë përpara dhe përkrahja për gjykatën do të tregoj përkushtimin e vazhdueshëm të Kosovës ndaj sundimit të ligjit”, thuhet në fund të deklaratës së Ambasadës së Shteteve të Bashkuara, lidhur me dërgimin e amandamenteve në Kuvend nga ana e qeverisë së Kosovës për themelimin e Gjykatës Speciale.