Pas raportimit të Zërit për skandalin e ambasadorit të Kosovës në Mal të Zi, Xhafer Ahmeti i cili në një postim në rrjetin social Facebook ofendon rëndë ish kryeministrin e Shqipërisë, Sali Berisha, duke e quajtur psikopat, i menjëhershëm ka qenë reagimi i ministrit në detyrë të Punëve të Jashtme të Kosovës, Enver Hoxhaj.
Hoxhaj ka marrë vendim për kthimin e menjëhershëm në Prishtinë të të ngarkuarit me punë të Kosovës në Mal të Zi, Xhafer Ahmeti, pas komenteve të tij të cilat nuk korrespondojnë me rregullat diplomatike dhe sjelljet e një diplomati.
Këtë e ka bërë të ditur për Zëri, këshilltari politik i Hoxhajt, Bashmir Xhemaj.
“Komentet e tij nuk paraqesin qëndrimet e institucioneve të Kosovës. Ministri Hoxhaj personalisht dhe i tërë populli i Kosovës i janë mirënjohës ish Kryeministrit të Shqipërisë, Sali Berisha për kontributin e tij të madh për Kosovën”, ka thënë Xhemaj.