Shkolla fillore “ Ardhmëria” në Landovicë po përballet me mungesë të ujit. Kushtet e pastërtisë në këtë shkollë janë të rënda.
Drejtori i shkollës, Islam Thaçi, thotë se gjatë ditës së sotme edhe ekipi i mjekëve të QKMF-së është duke kryer vizita sistematike të nxënësve dhe “jemi detyruar që më bidona të sigurojmë ujë”
“Për shqetësimin e mungesës së ujit dhe të ndotjes së tij, është e informuar DKA në Prizren si dhe KRU “ Hidroregjioni Jugor”. Kemi kërkuar që të marrin masa të menjëhershme në zgjidhjen e këtij problemi”, tregon ai.
Të shqetësuar për këtë çështje janë edhe nxënësit e shkollës. Rinora Morina dhe Festina Gashi, thonë se mungesa e ujit dhe ndotja e tij na shkakton telashe të mëdha gjatë kohës së vijimit të mësimeve.
Ndërkaq, drejtori i DKA-së në Prizren Nexhat Çoçaj, thotë se nuk është në dijeni për këtë shqetësim të drejtuesve dhe nxënësve të kësaj shkolle.
Zyrtarët e KRU “ Hidroregjioni jugor”, thanë se mungesa e shpeshtë e ujit në shkollën e Landovicës është si rrjedhojë e reduktimeve të energjisë elektrike në sistemin e pompimit, për shkak të punimeve që është duke i realizuar KEDS-i në rregullimin e linjës interkonjektive Kosovë – Shqipëri, dhe sipas këtyre zyrtarëve kjo çështje pritet të zgjidhet sa më parë që është e mundur. /TV Prizreni/