Kuvendi i Prizrenit mban sot seancën e radhës.
Ish-partneri i qeverisë së kryetarit Mythaher Haskuka, partia Nisma ka paralajmëruar bojkotim të kësaj seance.
Dy ditë me parë Komiteti për Politikë dhe Financa pati mbajtur mbledhjen e radhës, të thirrur nga kryesuesi i Kuvendit dhe i këtij komiteti, Artan Abrashi.
Pas miratimit të procesverbalit nga mbledhja e kaluar, u propozua që në rend dite të kësaj mbledhjeje të futen edhe dy pika të tjera, të cilat u propozuan edhe për rend dite të mbledhjes së Kuvendit.
E para ishte për shqyrtimin e raportit për llogari të arkëtueshme, verifikimin dhe inkasimin e tyre, dhe e dyta për shqyrtimin dhe miratimin e propozim-vendimit për lirimin nga pagesa e taksave komunale në ndërtimin e objektit të një familjeje me rast social.
Pikat e tjera të kësaj mbledhjeje që u diskutuan dhe u propozuan për rend dite në Kuvend janë:
-. Shqyrtimi dhe miratimi i propozim-buxhetit për vitin 2020 dhe parashikimi i buxhetit për vitin 2021-2022;
-. Rishqyrtimi i Rregullores 04/2019 për Transparencë në Komunë, sipas rekomandimeve të MAPL-së;
-. Shqyrtimi dhe miratimi i propozim-vendimit mbi hyrjen në koncesion të pronës komunale;
-. Informatë për Raportin e Komisionit për vlerësimin e ofertave për dhënien e pronës komunale në shfrytëzim dhe këmbim KK Prizren;
-. Shqyrtimi dhe miratimi i planit (3) tre vjeçar për banim;
-. Shqyrtimi i raportit financiar të realizimit të buxhetit për periudhën janar-qershor 2019;
Gjithashtu në këtë mbledhje u propozua që t’i dërgohet rekomandim Drejtorisë Komunale të Arsimit për zgjidhjen e çështjes së transportit dhe shpeshtimin e linjave të autobusit për nxënësit në disa fshatra të komunës së Prizrenit.