Opozita proteston sot për të kërkuar largimin e Ilir Metës nga posti i Kryetarit të Kuvendit. Grumbullimi i protestueve është parashikuar të nisë në orën 11:00 në Sheshin ‘Skënderbej’, për të vijuar më pas me marshimin drejt selisë së Kryeministrisë dhe godinës së parlamentit.
Thirrjes së Partisë Demokratike pritet t’i bashkohen edhe protestues të ardhur nga rrethet, të cilët janë nisur që në orët e para të mëngjesit drejt Tiranës. Policia bëri me dije se ka marrë të gjitha masat për mbarëvajtjen e protestës dhe për të reaguar në bazë të të dhënave për veprime të paligjshme.
Pas një mbledhje të Grupit Parlamentar, Kryetari i Partisë Demokratike, Lulzim Basha, tha se protesta e të enjtes paradite do të jetë paqësore. Ai ftoi qytetarët të marshojnë jo vetëm kundër inkriminimit të parlamentit, por edhe ndaj varfërisë, papunësisë dhe informalitetit.