Duket se fyerjet e rënda që i ka bërë kreut të partisë së tij, Isa Mustafës, kanë qenë të bereqetshme për Haxhi Avdylin edhe në kuptimin financiar.
Ai do të përfitojë subvencione, sipas Sinjalit, nga Prizreni që drejtohet nga Mytaher Haskuka i Vetëvendosjes.
Këta ishin muaj ferri për Isa Mustafën dhe LDK-në që po përjetonin sulme të rënda politike nga ana e Vetëvendosjes.
Por, përtej Vetëvendosjes, sulmet Mustafës në mënyrë të papritur e të ashpër i erdhën edhe nga disa bashkëpartiakë, përfshirë edhe z.Haxhi Avdyli, përcjell Periskopi.
Ai del se do t’i përfitojë diku 4 mijë deri në 5 mijë euro ndihma nga komuna për biznesin e tij privat shëndetësor.
“Nuk është pare për mu, por për punëtorët sikur qysh i kanë marrë nga 170 euro, do t’i marrin edhe tash njo 500-600 euro, mbi 500 euro, nuk është shumë e madhe, shuma është mbi 500 euro, këto punë i ka kryer kontabilisti, ai i përcjell këto sene edhe konkuron”, ka thënë Avdyli për Sinjalin.
Por, sa punëtorë i ka Avdyli në biznesin e tij privat të quajtur Spinal Center?
Sipas informatave nga ARBK-ja, ai i ka të regjistruar dhe deklaruar vetëm dy punëtorë, megjithëse në prononcim thotë t’i ketë plot tetë sosh.