Kryetarit të Prizrenit, Ramadan Mujës, do t’i kërkohet dorëheqja edhe me protesta.
Studentë dhe përfaqësues të shoqërisë civile, kanë paralajmëruar se të mërkurën do të organizojnë një protestë gjithëpopullore për të kërkuar dorëheqjen e Mujës nga posti i kryetarit të Prizrenit.
Përfaqësuesi i Këshillit të organizimit të protestës, Lirim Krasniqi, tha se moto e kësaj proteste do të jetë “Prizreni nuk i meriton hajnat”.
“ Protesta gjithëpopullore për dorëheqjen e Ramadan Mujës dhe të tjerëve që janë dënuar nga gjykata, do të mbahet të mërkurën para Kuvendit Komunal, duke filluar nga ora 12:00”, tregon Krasniqi,për “PrizrenPress”.
Kryetari i Prizrenit, Ramadan Muja dhe pesë ish-drejtorët e tij, janë dënuar me kusht, për këqpërdorim të detyrës zyrtare nga Gjykata Themelore në Prizren. Pavarësisht dënimit, Ramadan Muja ka mohuar dorëhqjen nga pozita e kryetarit të Prizrenit.
Organizim të protestave popullore për dorëheqjen e Mujës, kanë paralajmëruar edhe partitë opozitare, ndonëse deri më tash ende nuk kanë caktuar datën e mbajtjes së saj. /PrizrenPress.com/