Komuna e Prizrenit, të martën, ka njoftuar se në bashkëpunim me misionin e OSBE-së dhe me pjesëmarrjen e Policisë së Kosovës dhe të të rinjve të komuniteteve të ndryshme ka realizuar aktivitetin për pastrimin e shenjave të komunikacionit, duke kontribuar kësisoj në respektimin e gjuhëve zyrtare.
Shefi i Zyrës së informimit të Komunës së Prizrenit, Ymer Berisha, ka vlerësuar se ky projekt është përmbajtjesor për respektimin e vlerave demokratike dhe gjuhëve “si mundësi e vetme e avancuar e komunikimit me njëri-tjetrin në arritje të përbashkëta”, shkruan sot “Koha Ditore”.
“Të rinjtë shqiptarë, boshnjakë, turq dhe nga komuniteti RAE, ka realizuar projektin e pastrimit të shenjave të komunikacionit nga dëmtimet me të vetmin qëllim që drejtuesit e automjeteve motorike në hyrje të qytetit tonë ta kenë sa me të lehtë orientimin dhe të lëvizin lirshëm në gjithë territorin urban e rural të Komunës”, ka bërë të ditur Berisha. Sipas tij aktivitete të tilla të përbashkëta do të realizohen edhe në të ardhmen.