Kryetari i PDK-së Hashim Thaçi, sot në tubinin që mbajti në qytetin e Malishevës duke e quajtur atë si vend i fjalës, i besës dhe vend i vendimeve të mëdha të UÇK-së, u premtoi qytetarëve të këtij qyteti se do të ketë rritje të pagave, deri më 2018, deri në 100 për qind, të gjitha kategoritë, si dhe premtoi se të gjitha projektet e Isni Kilajt, e kanë mbështetjen e fuqishme të tij, si kryeministër i vendit dhe si lidership i PDK-së.
“Së pari ju uroj për fushatën e juaj, dinamike, aktive, të suksesshme. Malisheva ka qenë rruga e lirisë së Kosovës dhe nga sot është edhe rruga e fitores së PDK-së dhe kryetarit Isni Kilaj. Kryetari Isni Kilaj ka ndërtuar mbi 200 kilometra rrugë, ka ndërtuar shkolla, ka ndërtuar kanalizime e ujësjellës, pra e ka ndryshuar Malishevën, e ka ndërtuar Malishevën, nga një provincë në një qytet me një të ardhme evropiane”, tha Thaçi, transmeton Indeksonline.
“Fitorja e PDK-së do të jetë e fuqishme. Ju jam mirënjohës për fushatën e qetë dhe dinjitoze. Ju bashkëqytetar të mi, bashkohuni si dje si pjesëtar të UÇK, sot në fitoren e PDK-së. Malisheva është bastion, fuqi dhe vizion për Partinë Demokratike të Kosovës. Ndihuni krenar me fitoren e Partisë Demokratike të Kosovës. Deri sot askush nuk ka mundur të ju ligështoj dhe gjithmonë keni qëndruar fuqishëm në PDK”, u shpreh i bindur Thaçi.
E kandidati për kryetar të Malishevës Isni Kilaj foli para malishevasëve për të arriturat e kësaj komune gjatë periudhës së tij 4 vjeçare.
“Të dashur anëtarë dhe simpatizantë të Partisë Demokratike të Kosovës, për tri javë rresht kaluam fshat më fshat duke takuar qytetarët tanë, duke shpalosur programin qeverisës për periudhën e ardhshme katër vjeçare, pamë projektet e realizuara për katër vite, nevojat tuaja dhe objektivat, si dhe premtimet tona. Unë ju falënderoj Ju për mbështetjen që na dhatë, ju faleminderit që na dëgjuat e na pranuat në familjet tuaja, na përcollët fshat pas fshati, e lagje pas lagjeje”, ka thënë Kilaj.