Kryetari i Partisë Demokratike të Kosovës dhe kryeministri i Kosovës, Hashim Thaçi u ka premtuar qytetarëve të Rahovecit se që nga viti i ardhshëm, Qeveria e Kosovës, do të subvencionojë nga një mijë euro, për hektar të rrushit. Ai tha se e ka mbajtur fjalën deri tani, duke subvencionuar prodhuesit e rrushit me nga 500 euro.
“Iu betohem sot fermerë përsëri. Ne do ta mbajmë fjalën, ashtu siç e mbajtëm për rritjen për 500 euro për hektar për hardhi rrushi. Iu siguroi se nga viti i ardhshëm me zgjedhjen e Idriz Vehapit si kryetar i Rahovecit dhe unë si kryeministër i Kosovës, do ta kemi edhe më lehtë që për çdo hektar të rrushit, të paguajmë 1 mijë euro”, pohoi Thaçi,transmeton telegrafi.
Ai u ka bërë thirrje gjithë qytetarëve të Rahovecit, që më 1 dhjetor të dalin dhe ta votojnë PDK-në dhe Idriz Vehapin.
Ndërsa, kandidati për kryetar të komunës së Rahovecit, Idriz Vehapi tha se do të punojë së bashku me qytetarët e këtij qyteti, për një të ardhme më të mirë, për zhvillim ekonomik, për zhvillimin e bujqësisë dhe për një infrastrukturë më të mirë.