Kryeministri Hashim Thaçi ka thënë se zgjedhjet lokale në Kosovë kanë qenë të përmasave të papara për rajonin.
Në hapje të mbledhjes se qeverisë, ai ka uruar spektrin politik dhe qytetarët e Republikës së Kosovës për suksesin e organizimit të zgjedhjeve të raundit të dytë më 1 dhjetor, duke shtuar se këto zgjedhje ishin të një standardi të lart demokratik dhe se fitues janë të gjithë.
“Mendoj se kjo është një fitore e të gjithëve, është një fitore për shtetin e Kosovës në procesin e konsolidimit dhe shtet ndërtimit, por edhe të zhvillimit dhe forcimit të demokracisë. Organizimi i zgjedhjeve në të gjithë territorin e Republikës së Kosovës për herë të parë, është një sukses tjetër i rëndësishëm për shtetin tonë, për shoqërinë tonë, për institucionet tona në nivel qendror dhe lokal”, ka thënë Thaçi.
Ai ka falënderuar edhe monitoruesit ndërkombëtarë, Policinë e Kosovës, EULEX-in, KFOR-in, përfaqësuesit e SHBA-së, BE-së dhe të gjithë ata që kanë dhënë kontribut në këtë proces.