Kryetari i Prizrenit,Shaqir Totaj,bashkë me drejtoreshën e Arsimit, Luljeta Veselaj-Gutaj janë takuar me drejtorët e shkollave .
Totaj e Veselaj kanë falenderuar drejtorët e shkollave për punën e tyre.
Pas takimit, drejtoresha e Arsimit, Luljeta Veselaj-Gutaj, theksoi se qëllimi i këtij takimi ishte shqyrtimi i ecurisë së punës në shkolla.
Ajo shtoi se theks të veçantë në këtë takim i është kushtuar sigurisë në shkolla dhe ngritjes së cilësisë në arsim.
Gjatë takimit, drejtoresha e ShFMU “Naim Frashëri” në Vlashnje, Luljeta Gavazaj, sqaroi se si shkak i punimeve në shkollën e tyre për problemin që kanë me ngrohjet qendrore dhe dëmtimit të pompës, mësimi nuk do të fillojë të mërkurën, por të hënën e javës së ardhshme për shkollën amë.
Ndërsa, drejtoresha Veselaj-Gutaj tha se si drejtori kanë bërë mjaft përpjekje për t’iu dalë në ndihmë shkollave që kanë probleme të tilla, por që sipas saj kjo çështje është përgjegjësi që i takon KEDS-it. Drejtori i ShMLM “Luciano Motroni” në Prizren, Mehdi Krasniqi, theksoi se mungesa dhe ndërrimi i vazhdueshëm i kuadrit mësimor në shkollën e mjekësisë, si dhe vlera e pamjaftueshme e pagës sekondare për mësimdhënësit, janë ndër çështjet kryesore që po shkaktojnë probleme në arritjen e cilësisë më të mirë për ta.
Ai shtoi se janë bërë të gjitha përgatitjet për fillimin e gjysmëvjetorit të dytë shkollor.
Ndërkaq, drejtoresha Veselaj-Gutaj tha se të njëjtat probleme po hasin edhe shkollat e mjekësisë në komuna të tjera të Kosovës, për të cilën gjë si drejtori kanë parashtruar kërkesë në Ministrinë e Arsimit që të ofrojnë rekomandime se si duhet të veprojnë më tutje. Në këtë takim ishte i pranishëm edhe kryetari i komunës së Prizrenit, Shaqir Totaj, i cili falënderoi të gjithë drejtorët për përkushtimin dhe punën e tyre./TV Prizreni