Nexhat Z. dhe Elton M. ndodhen me mendje në Perëndim. I pari është i papunë, duke luftuar për mbijetesë. I dyti është duke studiuar. Secili nga ta ka plane për ta braktisur përgjithmonë Kosovën.
Nexhati e di se si është t’ia mësysh ilegalisht Evropës. I përballur me varfërinë dhe mungesën e një vendi pune, në fund të 2007-s kishte shkuar ilegalisht në Austri, ku kishte mundur të qëndronte jo më shumë se tre vjet. Ai ua kishte paguar rrjeteve të trafikimit rreth 2.200 euro, që ia kishin siguruar udhëtimin nëpërmjet Serbisë.
“Kur kam shku në Austri, jam lajmëru për azil. Nja tri vjet kam punu ka gjashtë muj me do letra sezonale”, tregon ai. “U ktheva më 18 gusht 2011. Nuk pata shans ma me nejt aty, sepse erdhën policia të fundit herë. Thanë edhe dy ditë vimë të marrim dhe ju qojmë atje ku i grumbullojnë, dhe 16 muaj e ke të ndalume Austrinë. Unë nuk dojsha me e pas të ndalume”.
Eltoni, një student Juridiku, kishte arritur të merrte para pak kohësh një vizë turistike për ta vizituar Gjermaninë. Ishte kjo mundësia e parë për ta shkelur një vend të Bashkimit Evropian. Festat e fundvitit të shkuar i kishte kaluar në Dusseldorf. Atje kishte parë një jetë tjetër nga kjo që bën në Kosovë, jetën të cilën edhe ai e do. /Koha Ditore/