Ideali e kishte frymëzuar rioshin ta rrokte pushkën. Nuk kishte menduar dy herë kur dy vëllezërit ushtarë ia kishin sjellë automatikun Behxhet Gashit, shkruan Koha Ditore.
Kishte shtrënguar fort rripin e uniformës ushtarake. Behxheti ishte vetëm tetëmbëdhjetë vjeç. Ishte i vendosur t’ua dëshmonte vëllezërve se mund të matej edhe ne frontin e luftës në verën e vitit 1998 në Vërmicë, një fshat kodrinor, jo fort larg Malishevës. Në verën e vitit pasues do të parakalonte kokëlartë me bashkëluftëtarë. Thataniku shtatgjatë kishte fituar luftën. Nuk i kishte shkuar ndërmend se në paqe do ta prisnin sfida të jashtëzakonshme.
Gashi është ish-ushtar i UÇK-së që nuk ka fituar kurrfarë mbështetjeje shtetërore pas përfundimit të luftës. Është i prerë kur flet për eprorët e luftës, që do të bëheshin bartës të institucioneve në liri.
“Lufta kish qenë veç për komandanta që me u ba milionera”, thotë Gashi, teksa shfryn mllefin për klasën e tanishme politike në qeverisje, që vazhdimisht pretendon se vlerat e luftës janë bazë e programeve qeveritare. /KD/