Kosova ka marrë vendim që të vendosë masa të reciprocitetit me Republikën e Bosnjë e Hercegovinës sa i përket regjimit të vizave.
Siç mësohet, në njërën prej mbledhjeve të veta, Qeveria ka marrë vendimin për ndryshimin e kushteve të hyrjes dhe regjimit të vizave për të huajt në Republikën e Kosovës.
Sipas pikës 6 të këtij vendimi, shtetasit e vendeve që nuk janë të listuara në pikën 1 të këtij vendimi, ose me të cilat nuk ka marrëveshje ndërkombëtare për hyrjen, transitin, ose qëndrimin në Republikën e Kosovës, mund të hyjnë, të kalojnë ose të qëndrojnë në territorin e Republikës së Kosovës me kusht që të kenë dokument udhëtimi valid dhe vizë kosovare. Një nga këto shtete është edhe Bosnjë e Hercegovina.
Në vendim po ashtu thuhet se Ministria e Brendshme, Policia e Kosovës dhe Ministria e Jashtme janë përgjegjëse për zbatimin e vendimit.
Burime brenda Ministrisë së Jashtme kanë bërë të ditur për KTV se shtetasit e Bosnjë e Hercegovinës vizat kosovare duhet t’i marrin në Ambasadën e Kosovës në Shqipëri.
E, shtetasit e vendeve për të cilat Republika e Kosovës aplikon regjim vizash, por të cilët kanë lejeqëndrim biometrik valid të lëshuar nga një prej shteteve të zonës Schengen (po ashtu bartësit e vizës valide shumëhyrëse të Schengenit), lirohen nga nevoja për t’u pajisur me vizë kosovare për hyrje, transit dhe qëndrim në territorin e Republikës së Kosovës. Mirëpo, qëndrimi i tyre brenda territorit të Kosovës kufizohet në 15 ditë.