Lëvizja Vetëvendosje ka reaguar në lidhje me arrestimin e deputetes Albulena Haxhiu, kjo e fundit është arrestuar mëngjesin e sotëm.
Vetëvendosje në reagimin e tyre thotë se pushteti po përdor secilin mjet për ta shtypur opozitën. Ndër të tjera VV shprehet se opozita e bashkuar nuk do të ndalet deri në tërheqjen e marrëveshjeve.
“Sot u arrestua deputetja e Kuvendit të Republikës së Kosovës, Albulena Haxhiu, teksa po shkonte në një tubim në Gjilan. Kjo qeveria kriminale, PDK-LDK-Srpska, po e përdor secilin mjet për ta shtypur opozitën ashtu që t’i realizojë projektet e Serbisë në Kosovë”, thuhet ne reagim.
“Veprimet e deputetëve të opozitës brenda Kuvendit të Republikës së Kosovës janë në funksion të mbrojtjes së sovranitetit të shtetit. Opozita e bashkuar nuk do të ndalet deri në tërheqjen e marrëveshjeve të 25 dhe 26 gushtit”.
“Nëse Qeveria e Kosovës nuk guxon t’i tërheqë marrëveshjet, atëherë lë t’i hedhë në referendum, dhe le të vendos populli i Kosovës për to. Nëse as referendumin nuk guxon ta organizojë, atëherë duhet që sa më parë vendi të shkojë në zgjedhje”.