Anëtarja e Kryesisë së LDK-së, Vjosa Osmani, përfundimisht e ka ndarë mendjen që t’i hyjë garës për kryetare të LDK-së.
Siç merr vesh ORAinfo, Osmani kandidaturën e saj për të parën e LDK-së do ta zyrtarizojë gjatë kësaj jave.
“Pas një trysnie të madhe nga anëtarësia e partisë, Vjosa Osmani ka vendosur qe të kandidojë për kryetare te LDK-së. Ajo kandidaturën e saj do ta bëjë publike këtë javë”, ka thënë një burim i afërt me deputeten Osmani.
Sipas këtij burimi, nëse disponimi i anëtarësisë reflekton edhe të delegatët, atëherë padyshim që Vjosa Osmani do të fitojë garën për kryetare të LDK-së.
Ndërsa ka mohuar se Osmani mund të largohet nga LDK-ja nëse nuk arrin të zgjidhet kryetare.
Në garën për kryetar të LDK-së, Vjosa Osmani pritet të sfidohet nga kryetari i nderit të kësaj partie, Fatmir Sejdiu dhe kryetari aktual Isa Mustafa.
Nuk është përjashtuar mundësia që pjesë e garës të jetë edhe anëtari i kryesisë së LDK-së, njëherësh kryetar i Gjilanit, Lutfi Haziri.
Kuvendi zgjedhor i LDK-së pritet të mbahet në fund të këtij muaji, ku pritet të zgjedhet kryetari, nënkryetarët dhe kryesia e re. /ORAinfo/