Lëvizja Vetëvendosje! ka vizituar Shoqatën e Veteranëve të Arsimit në Prizren.
Kandidati i VV-së për kryetar të Prizrenit, Arbër Rexhaj falënderoi veteranët e arsimit për kontributin e paçmueshëm të tyre në ndërtimin dhe zhvillimin e arsimit në kohët më të vështira.
“Përmirësimi i cilësisë së arsimit fillon nga departizimi i këtij sektori shumë të rëndësishëm të Komunës. Përmes departizimit arrihet niveli më i mirë dhe menaxhimi më i suksesshëm i saj si kusht që fëmijëve tanë t’i sigurohet një arsimim më i mirë”, tha Rexhaj.
Ndërkaq, kryetari i Shoqatës së Veteranëve të Arsimit, Ruzhdi Saramati me bashkëpunëtorë, ka informuar Lëvizjen Vetëvendosje! për problemet me të cilat ballafaqohen ata si dhe mungesën e ndihmës dhe mbështetjes institucionale për ta. Saramati shprehi brengën e mungesës së përkujdesjes së përhershme nga ana e Komunës për këtë kategori./PrizrenPress.com/