Kryetari i Gjykatës Themelore në Prizren, Ymer Hoxha nuk është i njoftuar për hyrjen në grevë të tre të burgosurve. Ai thotë se deri më tash nuk ka pranuar asnjë shkresë nga të burgosurit.
“Nuk kam pranuar asnjë shkresë nga ana e të burgosurve për këto pakënaqësi”, ka thënë Hoxha për RTK.
Qëndrim Rexha, Abdullah Zogaj dhe Skënder Selmani që në burgun e Prizrenit vuajnë dënimin e gjykatës së shkallës së parë prej më shumë se pesë vjet, që nga tetori i 2013-tës, nga dita e djeshme janë futur në grevë urie, në shenjë pakënaqësie për vonesë apo stërzgjatjen e shqyrtimit të lëndës se tyre nga ana e EULEX-it, në shkallën e dytë të gjykatës.
Grevën e kanë konfirmuar edhe burime nga Qendra e Paraburgimit në këtë qytet. Ndërsa Koordinatori i KMDLNJ-së në Prizren, Bashkim Kajdomçaj ka njoftuar se, në arsyetimin e shkakut të kësaj greve, të burgosurit kanë thënë se, janë pakënaqësitë që kanë të bëjnë me stërzgjatjen e shqyrtimit të plotfuqishmërisë së kësaj lënde nga ana e Gjykatës në shkallën e dytë, apo asaj të Apelit.
Në Gjykatën Themelore në Gjilan më 16-të tetorë 2013-të trupi gjykues i kryesuar nga gjyqtari i EULEX-it Arkadiusz Sedek, kishte shpallur aktgjykimin ndaj grupit të Dobrosinit të njohur si “Lëvizja e Lirë” të përbërë prej 10-të vetash, me 56 vite e 44 muaj burgim./PrizrenPress.com/