Ndeshja miqësore me Bayernin e luajtur në New Jersey mund të shërbejë si një aperitiv për Real Madridin para Superkupës së Evropës, aty ku i pret Sevilla.
Djemtë e teknikut Zinedine Zidane nuk shkëlqyen në sfidën e fituar 1-0 me gol të mbrojtësit Danilo, por mposhtën ish-trajnerin e tyre Carlo Ancelotti, i cili i njeh mirë ata.
Përballja me andaluzianët do të jetë krejt tjetër, sepse – përveç mungesës së bërë publike me kohë të Cristiano Ronaldos – “Galaktikët” me shumë mundësi do të udhëtojnë pa tre titullarë për në Sokholm të Norvergjisë.
“Nuk mendoj se Gareth Bale, Toni Kroos dhe Pepe do të jenë mjaftueshëm gati për të luajtur”, – tha Zidane në konferencë për shtyp.
“Ata të cilët nuk kanë qenë me ne gjatë fazës përgatitore do të vlerësohen kur të kthehen në Madrid”, – shtoi francezi, i cili nënvizoi se është shumë i kënaqur me ritmin e lojtarëve të tij gjatë seancave stërvitore dhe miqësoreve në Amerikën e Veriut, por pranoi se është i shqetësuar për formën fizike të bashkëpatriotit të tij, Karim Benzema.
“Shpresoj që ai të jetë mirë për Superkupën. Ai ndihet mirë dhe i ka kryer seancat stërvitore.”
Ish-kampioni i botës 1998 përsëriti synimin e tij për mbajtjen e mesfushorit 20-vjeçar Marco Asensio në “Santiago Bernabeu”, i cili luajti mjaft mirë kundër Bayernit.
“Do të doja që Asensio të qëndrojë me ne, por do të kemi kohë për të folur porsa të kthehemi në Madrid”, – përfundoi “Zizu”-ja. Real Madridi luan më 9 gusht për trofeun që përmbledh triumfuesin e kontinentit evropian. /Telesport.al