Veteran dhe invalid i luftës, si dhe asamblist me përvojë shumëvjeçare, Agim Muqaj ka shpallur zyrtarisht kandidaturën e tij për deputet në Kuvendin e Kosovës nga radhët e Aleancës për Ardhmërinë e Kosovës (AAK).
Ai tregon se kandidatura buron nga dëshira për të çuar përpara vlerat e sakrificës, respektin për veteranët, mbështetjen për familjet, forcimin e ekonomisë dhe ndërtimin e institucioneve që i shërbejnë qytetarit.
Shprehet se përvoja e tij, si në kohë lufte ashtu edhe në kohë paqeje, e ka mësuar se zhvillimi i Kosovës kërkon njerëz të sinqertë, të guximshëm dhe të përkushtuar.
“Me përkrahjen tuaj, jam i gatshëm të jem zëri i së vërtetës, i drejtësisë dhe i vizionit për një të ardhme më të mirë. Së bashku mund të ndërtojmë një shtet me më shumë mundësi, më shumë siguri dhe më shumë dinjitet”, shkruan Muqaj./PrizrenPress.com/
KRU “Hidroregjioni Jugor” në Prizren ka njoftuar se ekipet e inspektoratit po vazhdojnë aksionin e shkyçjeve nga rrjeti i ujësjellësit ndaj konsumatorëve që kanë borxhe të pashlyera, pavarësisht njoftimeve të mëparshme dhe mundësive të ofruara për pagesë.
Në njoftim theksohet se të gjithë konsumatorët që nuk kanë shlyer obligimet financiare rrezikojnë ndërprerjen e furnizimit me ujë.
Kompania u bën thirrje qytetarëve që të kryejnë pagesat sa më parë, për të shmangur masat e shkyçjes.
KRU “Hidroregjioni Jugor” ka ftuar konsumatorët që kanë nevojë për informacione shtesë ose sqarime të drejtohen në qendrat e shërbimit të kompanisë.
Sot, në mbledhjen inauguruese të Kuvendit të Komunës së Malishevës, dhanë betimin Kryetari i Komunës, Ekrem Kastrati, si dhe 27 anëtarët e rinj të Kuvendit Komunal.
Të zgjedhurit nënshkruan edhe deklaratat zyrtare të betimit, raporton PrizrenPress.
Pas ceremonisë, Kastrati falënderoi qytetarët për besimin e dhënë për mandatin e ri.
“Do të punoj dhe angazhohem pa dallim për të gjithë banorët e Malishevës. Jam kryetar i të gjithëve, pa asnjë dallim”, theksoi ai.
Kastrati rikujtoi projektet e realizuara gjatë katër viteve të fundit, duke veçuar projektin transformues “Malisheva urbane”.
“Ky projekt ka qenë një ndër më të rëndësishmit për qytetin dhe do të vazhdojë me faza të reja, duke u shtrirë edhe në zonat rurale”, shtoi ai.
Kryetari Kastrati gjithashtu u zotua për vazhdimësi në përmirësimin e infrastrukturës, shëndetësisë, arsimit, rinisë, kulturës, sportit dhe bujqësisë, duke e konsideruar mbështetjen e qytetarëve si përgjegjësi për katër vitet e ardhshme.
Në përmbyllje të ceremonisë, kryetari dhe anëtarët e Kuvendit bënë homazhe në varrezat e dëshmorëve në Malishevë dhe Kleçkë, duke nderuar sakrificën dhe kontributin e tyre për lirinë e vendit./PrizrenPress.com/
Kryetari I Prizrenit Shaqir Totaj ka pritur delegacionin e KfW-së, diskutohet për projekte të ujërave të zeza dhe menaxhimin e mbeturinave
Gjatë takimit u diskutua për koordinimin e projekteve në sektorin e ujërave të zeza dhe për mundësitë e avancimit të shërbimeve infrastrukturore për qytetarët e Prizrenit.
Një nga temat kryesore ishte projekti për rehabilitimin dhe modernizimin e deponisë së mbeturinave në Landovicë, i cili përfshin nxjerrjen e gazit dhe trajtimin e ujërave të ndotura. Projekti aktualisht ndodhet në fazën e dizajnimit.
Kryetari Totaj shprehu mbështetjen e komunës për realizimin e këtyre investimeve, duke theksuar se përmirësimi i shërbimeve publike mbetet prioritet.
“Komuna e Prizrenit do ta vazhdojë mbështetjen për ndërmarrjet publike, me synim krijimin e një mjedisi më të pastër dhe më të shëndetshëm për të gjithë qytetarët”, deklaroi ai.
Dioqeza Prizren-Prishtinë në bashkëpunim me Argjipeshkvinë e Tivarit ka ftuar besimtarë, studiues dhe artdashës në edicionin e radhës të “Ditëve të Bogdanit 2025”, që do të mbahen të shtunën në Qendrën BogdaniPolis në Prishtinë.
Këtë vit, ngjarja do t’i kushtohet 100-vjetorit të lindjes së Dom Simon Filipajt, njërit ndër figurat më të shquara të kulturës shqiptare, i njohur si përkthyesi i Biblës në gjuhën shqipe.
Programi i Ditës së Bogdanit 2025
Ngjarjet do të nisin në ora 16:00 me një Akademi Shkencore, ku ligjërues të njohur do të trajtojnë dimensione të ndryshme të jetës dhe veprës së Dom Simon Filipajt. Ndër ta përfshihen:
Imzot Zef Gashi – Njohja dhe bashkëpunimi shumëvjeçar me Dom Simon Filipajn
Dom Lush Gjergji – Botimet biblike dhe liturgjike nën kujdesin e tij
Dom Simo Luliq – Zgjedhja e disa fjalëve të rralla në procesin e përkthimit
Dom Kolë Dedaj – Poezia hebraike në përkthimet e tij dhe në Shkollën Biblike
Evalda Paci – Analizë mbi tekstet biblike të Filipajt
Ndue Ukaj – Bibla dhe letersia shqipe
Në ora 18:00, në Katedralen “Shën Nënë Tereza”, do të mbahet Mesha e Shenjtë, e drejtuar nga Imzot Zef Gashi, argjipeshkëv në pension i Tivarit.
Aktivitetet do të vijojnë në ora 19:00 me një tjetër Akademi Shkencore, ku do të mbahen fjalë përshëndetëse nga autoritetet dhe do të zhvillohet Lectio Magistralis nga Imzot Rrok Gjonlleshaj, i cili do të flasë mbi figurën e Dom Simon Filipajt si meshtari që “i foli Zotit shqip”.
Pjesë e mbrëmjes do të jenë edhe pika muzikore me vepra të Frédéric Chopin, Giulio Caccini (“Ave Maria”), si edhe interpretimet e korit të Katedrales “Shën Nënë Tereza”.
Mbrëmja do të përmbyllet në ora 20:00 me një koktej në “Agorà”.
Dom Simon Filipaj – një jetë në shërbim të Fjalës së Zotit
Dom Simon Filipaj mbetet një ndër figurat qendrore të botimeve kishtare shqiptare, falë angazhimit të tij dekada të tëra në përkthimin dhe redaktimin e teksteve biblike. Përkthimi i Biblës në shqip konsiderohet një vepër monumentale, që bashkoi përpjekje shkencore, gjuhësore dhe shpirtërore.
Ngjarja “Ditët e Bogdanit” vazhdon traditën vjetore të nderimit të kulturës, dijes dhe historisë katolike shqiptare, duke e shndërruar Prishtinën në një qendër të reflektimit intelektual dhe shpirtëror./KultPlus.com
Ka ndërruar jetë në moshën 66-vjeçare ish-futbollisti i KF Liria, Refki Neziri, nga Lubizhda e Prizrenit.
Neziri ishte pjesë e gjeneratave të viteve ’80 të klubit prizrenas, ndërsa për shumë vite shërbeu edhe si mësimdhënës në shkollën “Ekrem Rexha” në Lubizhdë. Vitin e kaluar ai ishte pensionuar nga arsimi.
Me ftesë nga HANDIKOS-i, kryetari i Rahovecit, Smajl Latifi, mori pjesë në një takim miqësor me drejtuesit dhe me anëtarët e shoqatës, në shënimin e 3 dhjetorit, ditës Ndërkombëtare të Personave me Nevoja të Veçanta.
Kryertari Latifi ka thënë se kjo ditë na kujton se respekti, barazia dhe përfshirja, janë detyrim i tyre.
“Personat me nevoja të veçanta nuk kërkojnë mëshirë, por mundësi të barabarta dhe vlerësim për aftësitë dhe për kontributet e tyre. Si institucion, mbetemi të përkushtuar të sigurojmë kushte sa më të mira dhe mbështetje të vazhdueshme, që secili të jetojë me dinjitet dhe të ndihet pjesë aktive e shoqërisë sonë”, ka theksuar ai.
Në Malishevë është arrestuar një person i dyshuari për dhunim.
Ai siç ka njoftuar Policia e Kosovës është dërguar në mbajtje.
“Më 02.12.2025 është arrestuar i dyshuari mashkull kosovar pasi që i njëjti dyshohet se kishte kryer marrëdhënie seksuale me viktimën femër kosovare, Me vendim të prokurorit, pas intervistimit i dyshuari është dërguar në mbajtje”, thuhet nga policia.
Gjatë kontrollit rutinë në pikëkalimin kufitar në Vërmicë, zyrtarët doganorë kanë ndaluar një automjet për kontroll të detajuar në vijë të dytë.
Sipas një postimi në rrjetin social në Facebook bëhet e ditur se gjatë kontrollit, në bagazh janë zbuluar mallra të padeklaruara të llojit tekstil, për të cilat dyshohet se shkelin të drejtat e pronësisë intelektuale.
“Pas konfirmimit, mallrat janë ndaluar deri në përfundimin e procedurave përkatëse ligjore, ndërsa ndaj palës është iniciuar procedurë për kundërvajtje doganore, në përputhje me legjislacionin në fuqi. Dogana e Kosovës vazhdon angazhimin e saj për të parandaluar hyrjen e produkteve që cenojnë pronësinë intelektuale, me qëllim mbrojtjen e konsumatorëve dhe tregut të ligjshëm”, thuhet në postim.
Shaban Shabani, ish-kandidat i Partisë Demokratike të Kosovës për kryetar të Dragashit, ka bërë të ditur se nuk do të jetë pjesë e garës për deputet në zgjedhjet e 28 dhjetorit.
Ai ka sqaruar se këtë herë nuk do të kërkojë votën e qytetarëve për nivelin qendror.
“Në këto zgjedhje nuk do të jem kandidat për deputet!”, u shpreh Shabani për FrontOnline.
