Nën organizimin e Kryetarit të Komunës së Malishevës, Ekrem Kastrati, dhe Organizatave të dala nga lufta e UÇK-së – dega në Malishevë, është mbajtur akademi përkujtimore në njëvjetorin e ndarjes nga jeta të veprimtarit dhe komandantit të Ushtrisë Çlirimtare të Kosovës, Naser Shala – Komandant “Ftyra”.

Në këtë përvjetor, me pjesëmarrje nga të gjitha trojet shqiptare, u nderua jeta dhe vepra e tij, ndërsa u theksua se Kosova dhe mbarë kombi shqiptar përulen me nderim të thellë para sakrificës së tij për liri dhe shtetndërtim.

Kryetari i Komunës së Malishevës, Ekrem Kastrati, në fjalën e tij vlerësoi lart figurën e Komandant “Ftyrës”, duke e cilësuar atë si simbol të përkushtimit dhe sakrificës për atdheun dhe ndërtimin e shtetit të Kosovës.

Ndërkaq, bashkëluftëtari i tij, Fatmir Limaj – Komandant “Çeliku”, solli kujtime nga periudha e luftës dhe pas saj, duke theksuar se angazhimi i Naser Shalës ka qenë i domosdoshëm edhe në periudhën e pasluftës. Ai u shpreh se kujtimi i tij rikujton amanetin e brezit të luftës për ruajtjen e lirisë, forcimin e shtetit dhe bashkimin kombëtar.

Ish-kryeministri i Kosovës, Ramush Haradinaj, theksoi se figura e Naser Shalës mbetet shembull i guximit, besnikërisë dhe dashurisë për atdheun, duke shtuar se ai ishte ndër ata që nuk kursyen asgjë për lirinë e Kosovës.

Përfaqësuesi i OVL-së së UÇK-së në Malishevë, Metush Kryeziu, u shpreh se vepra e luftëtarëve të lirisë mbetet udhërrëfyes për brezat e ardhshëm. Ndërsa historiani Ibrahim Gashi trajtoi në mënyrë shkencore kontributin e Naser Shalës.

Në kuadër të kësaj akademie, gjenerali Agim Çeku i dorëzoi Bislim Shalës, djalit të Naser Shalës, uniformën e veteranit të UÇK-së.

Në këtë përkujtim morën pjesë edhe familjarë të dëshmorëve dhe personalitete të shumta nga jeta politike, ushtarake dhe shoqërore, përfshirë familjen e Komandant Kumanovës, familjen e Tahir Sinanit, si dhe familjarë të Hashim Thaçit dhe Kadri Veselit.

Programi u pasurua edhe me pika artistike kushtuar figurës së Naser Shalës, ku u prezantua premierë kënga “Legjendë e Gjallë”, e shkruar nga Rexhep Selimi, si dhe u interpretua recitali “Zgjohu Kosovë”.

Në kuadër të aktiviteteve përkujtimore, u bë edhe zbulimi i pllakës përkujtimore në fshatin Banjë, si dëshmi e përhershme e kontributit të tij për lirinë dhe shtetndërtimin e Kosovës, ku folën edhe Halit Krasniqi dhe Fatmir Shurdhaj.

Në fund, në emër të familjes, Bislim Shala falënderoi të gjithë pjesëmarrësit për nderimin dhe përkujtimin e veprës së babait të tij.

Lavdi e përjetshme jetës dhe veprës së Naser Shalës – Komandant “Ftyra”! Lavdi të gjithë dëshmorëve të kombit!

Marketing

Kryetari i Komunës së Suharekës, Bali Muharremaj, ka njoftuar se ekipi i matematikës nga kjo komunë është nisur drejt Gjermanisë për ta përfaqësuar Kosovën në Finalen e Olimpiadës Botërore të Matematikës, e cila mbahet në Frankfurt.

“Sot me kënaqësi përcollëm ekipin tonë të matematikës dhe koordinatorin për Kosovë prof. Emin Hoxha, të cilët po nisen drejt Gjermanisë për të përfaqësuar Kosovën dhe Suharekën në Finalen e Olimpiadës Botërore të Matematikës në Frankfurt”, ka shkruar Muharremaj në Facebook.

Realizoni projektet tuaja me BiCredit, partneri juaj i besueshëm financiar në Prizren!

Sipas tij, gjashtë nxënësit janë kualifikuar pas një gare të gjerë ndërkombëtare, ku kanë marrë pjesë mbi 26 mijë nxënës nga 173 shtete.

“Është një krenari e veçantë që kualifikimi i gjashtë nxënësve tanë erdhi pas një konkurrence të fortë me mbi 26,000 nxënës nga 173 shtete të botës”, ka theksuar Muharremaj, duke shtuar se ata janë renditur “në 20% e parë në nivel ndërkombëtar”.

Muharremaj ka bërë të ditur se, bashkë me drejtorin e Arsimit në Suharekë, Remzi Bajselmani, u kanë uruar rrugë të mbarë nxënësve dhe koordinatorit të Kosovës për këtë olimpiadë, prof. Emin Hoxha.

“Bashkë me Drejtorin e Arsimit, z. Remzi Bajselmani, i uruam rrugë të mbarë koordinatorit Emin Hoxha dhe nxënësve tanë”, ka shkruar ai.

Kryetari i Suharekës ka theksuar se komuna do të vazhdojë t’i mbështesë nxënësit në garat ndërkombëtare, ndërsa ka shprehur besimin se ekipi do të kthehet me rezultate pozitive.

“Komuna e Suharekës do të vazhdojë të jetë krah i fortë i nxënësve në arenat ndërkombëtare… Ne besojmë në dijen e tyre dhe jemi të bindur se do të kthehen me suksese që do të na bëjnë të gjithëve krenarë”, ka përfunduar Muharremaj.

Drejtoria e Urbanizmit në Komunën e Malishevës ka njoftuar qytetarët për ndërprerje të përkohshme të qarkullimit në rrugën “Medlin Ollbrajt”, për shkak të punimeve infrastrukturore që po zhvillohen në këtë segment, raporton PrizrenPress.

Sipas njoftimit, nga data 28.04.2026 deri më 01.05.2026, një pjesë e rrugës do të jetë e mbyllur për qarkullim, ndërsa një krah i saj do të mbetet i hapur për lëvizje të automjeteve.

“Për të mundësuar lëvizjen, një krah i rrugës do të jetë i hapur për qarkullim. Banorëve që jetojnë në këtë rrugë do t’u sigurohet qarkullim i pandërprerë”, thuhet në njoftim.

Më tej thuhet se ndërprerja e përkohshme e qarkullimit po bëhet për shkak të punimeve për vendosjen e gypave të kanalizimit fekal dhe atmosferik në këtë segment rrugor.

Nga Komuna e Malishevës u është bërë thirrje qytetarëve për mirëkuptim dhe respektim të sinjalizimit në terren gjatë kohëzgjatjes së punimeve./PrizrenPress.com/

Marketing