Kampioni i Botës, Gjermania, është gjunjëzuar para Francës.
Francezët kanë siguruar kualifikimin në Finalen e Euro 2016, pasi ka eliminuar Gjermaninë me rezultat 2:0.
Antoine Griezmann shënoi të dy golat në triumfin historik të Francës.
Golin e parë, ai e shënoi në minutën e fundit të pjesës së parë nga pika e bardhë, ndërsa të dytin në minutën ’72.
Në finalen e së dielës, Franca do të luajë me Portugalinë.
Në Prizren, tradita e organizimit të dasmave vazhdon të mbetet e gjallë si dikur, por me modernizimin e tyre ka humbur edhe një pjesë e traditës së kësaj ceremonie.
Më të vjetrit ankohen se në dasmat e sotme shqiptare, shumica e riteve janë të huaja, të huazuara nga vendet e perëndimit apo të lindjes, kurse traditat shqiptare kanë filluar të rrënohen si pasojë e kopjimit nga popujt e tjerë. Një prej traditave të hershme është edhe lyerja me kanë, që njihet edhe si Nata e kanës. Ritet e dasmës prizrenase janë një traditë e hershme, e kultivuar me shekuj, e bartur brez pas brezi, duke futur elemente të reja. Ritet e dasmës prizrenase dikur ishin: fejesa e djalit dhe vajzës, apo si njihej ndryshe si “dhënia e dorës”, pastaj vetë përgatitjet për dasmë, caktimi i kohës së dasmës i njohur si “vade”, dërgimi i rrobave për nusen dhe niqahu etj. Edhe dita kryesore e jetës së një çifti, pra dita e dasmës së tyre kishte ceremonitë e veta. Një prej këtyre ceremonive ishte edhe vënia e kanës për nusen që do të martohej. Kjo traditë tregohet me mall nga gratë e Prizrenit.
“Nata e fundit ishte ajo kur vajzës i ngjitej kana. Kana atëbotë që përdorej ndryshe quhej edhe Kana e Çabes. Kjo ndoshta edhe për shkak të prejardhjes së saj, por ndoshta edhe për shkak të besimit që duhej ta bënte sa më të madh besimin e kanës”, tregon Nexhmije Veselaj nga Prizreni.
Kurse, e moshuara Hanife Berisha tregon se ishte krijuar një traditë se çika që njëherë ngjiste kanën, ajo më kurrë s’kishte arsye për të ngjitur kanë së dyti.
“Edhe nëse fati i saj i shkon me u martue edhe ndonjëherë tjetër për shkak të vdekjes së burrit ose ndonjë arsye tjetër, ajo më nuk mund të ngjiste kanën”, thotë Berisha.
Hasi e ruan traditën
Tradita e kanës shoqërohej edhe me një thellësi artistike. Kana e nusërisë ishte me tipare të ndryshme. Ajo kryesisht ngjitej me pika të kuqe, që do të thotë se në familjen e saj dëshironte ta linte respektin e dashurinë për familjen e babës. Ajo kanë në dorën e nuses rrinte deri në tri javë.
Berisha rrëfen se tash kanën e përdorin kryesisht më të moshuarat për ngjyrosjen e flokëve në ndonjë festë edhe për t’ia bërë ndonjë pikë në dorë si shenjë kujtimi për të kaluarën apo për ripërtëritjen e një tradite të dikurshme.
“Kanën tani po e zëvendësojnë edhe ngjyrat e ndryshme”, thotë Berisha, duke shtuar se kana e duarve ose kana e Çabes ka pasur një traditë shumë të gjatë në Prizren.
Por, kjo traditë tashmë vazhdon, ende të ruhet në disa lokalitete. Kështu, si vend që e ka ruajtur këtë traditë është lokacioni i Hasit.
Xhemilje Çoçaj tregon se kjo traditë vazhdon ende tek secila vajzë.
“Atje ruhen edhe plot këngë. Këngët e kanës kanë më shumë një dhembje të vajzës së shtëpisë”, thotë ajo.
Kana e Çabes ruhet si një traditë e besnikërisë Ngjitja e kanës është ruajtur si një traditë e lashtë, sepse vajza që po martohej me duart me kanë duhej ta linte një shenjë në familjen e vajzërisë. Dikur ka pasur raste kur vajza është kthyer në shtëpi edhe pas një viti ose edhe më gjatë, kurse shenja në derë të shtëpisë është ruajtur me kujdes, si shenj se prindërit mund ta kujtonin atë duke e parë shenjën sa herë hynin në shtëpi. Edhe tani disa nga vajzat e reja preferojë që të ngjallin disa nga traditat e vjetra edhe në kohët moderne. Ato nuk i japin rëndësinë që i jepej dikur kësaj tradite, por duan që dasmat e tyre të jenë njëkohësisht mondane dhe tradicionale. Kjo traditë u ka rënë në sy edhe artistëve të rinj, të cilët duan që këtë traditë t’ia prezantojnë botës. Kështu edhe revista me renome kanë shkruar për traditën e zbukurimit të duarve dhe fytyrës së nuseve shqiptare të Hasit.
Megjithatë, për më të moshuarat, asgjë nuk mund të zëvendësojë traditën e bukur që ka ekzistuar dikur dhe gjithçka mbetet vetëm një imtim i dobët i asaj trashëgimie të pasur.
“Dikur ajo duhej ta zbukuronte pak a shumë dorën, sepse kalonte më shumë se një muaj dhe nusja në shtëpi të burrit duhet të merrte temenanë, e zbukurimi dorës me kanë ia jepte kuptimin më shumë temenasë”, tregon Shahe Gashi.
Kjo traditë ishte përqafuar nga ë gjitha familjet shqiptare pa dallim feje.
“Po kështu ishte traditë edhe tek vajzat e besimit katolik, sepse tradita e dikurshme për nusëri ishte njëjtë pa marrë parasysh besimin”, tregon Roza Lekaj.
Por, sipas studiuesve, duket se modernizimi i dasmave ka bërë që një pjesë e traditës të mbetet më tepër si relikt i kohës.
“Për shkak se ajo kanë nuk hiqet kur të duash, shumica e vajzave as që e përdorin. Kjo tregon se një pjesë e traditës po vdes”, tregon Arbnore Kolgjerja, etnologe. /Kosova Sot/
Vendi ku zakonisht i kulloste delet u bë fatkeq për Sami Halimin, 40 vjeçar.
Bariu i Bjeshkëve të Kuklibegut të Dragashit e gjeti vdekjen pasditen e së mërkurës pas goditjes nga rrufeja.
I ndjeri është varrosur në varrezat e fshatit në fjalë këtë të enjte, ndërkaq për rastin rrëfeu vëllai i tij i cili tregoi se kur e pa viktimën kishte kërkuar ndihmë edhe tek bashkëfshatarët.
Në vendin e ngjarjes u konstatua se rrufeja i vrau edhe 13 dele e që për groposjen e tyre e mbikqyri inspektori i Komunës se Dragashit, njofton Klan Kosova.
Emily Ratajowski është një nga femrat më të kërkuara në industrinë e modës dhe sa hera 25-vjeçarja publikon foto, interesi është më të vërtetë i madh.
Këtë herë, Emily ka realizuar foto fantastike për kopertinën e revistës së njohur “Bazaar”.
Modelja, që ka miliona ndjekës në Instagram, është fotografuar tërësisht nudo ndërsa qëndron mbi një kalë të bardhë.
Qendërmbrojtësi me përvojë i Superligës së Kosovës, Erdin Hashani, sot bashkë me 4 lojtarë tjerë u prezentua te Liria.
Hashani, duke folur për faqen zyrtare të klubit të Lirisë, ka bërë të ditur që përforcimet do të arsyetojnë besimin e ekipit prizrenas dhe do të tregojnë cilësi në stinorin që vjen.
“Do të tregojmë se kemi ardhur për të treguar cilësi këtu. Do të shpaguajmë mundin e drejtuesve që na besuan si dhe do t’i kënaqim tifozët me lojëra të mira”, ka thënë Hashani.
Përveç Hashanit, Liria ka përforcuar radhët e saj edhe me Ditëlind Reshitin, Meriton Korenicën, Durim Gashin dhe Alban Shillovën. /PrizrenPress.com/
Skuadra e Lirisë së Prizrenit sot ka prezentuar përforcimet e skuadrës duke nisur njëkohësisht edhe stërvitjet e para për stinorin e ri 2016/17.
Me Ramiz Krasniqin në krye, bardhezinjtë kanë prezentuar edhe qendërmbrojtësin me përvojë Erdin Hashani, pastaj Alban Shillovën e dalluar si dhe Meriton Korenicën, Durim Gashin dhe Ditëlind Reshitin.
Kryetrajneri Krasniqi do të punojë me ndihmësit e tij Blerim Zherka, Erdogan Brando dhe Nazmi Rama.
Ndërkaq drejtori i klubit Erxhan Dana ka bërë të ditur për faqen zyrtare të klubit se me këto përforcime, bardhezinjtë kanë mbyllur punën e përforcimeve para stinorit të ri.
“Mendoj, që me këto prurje kemi përmbyll pjesën më të nevojshme që kemi aspiruar. Tash presim që futbollistët e sjellë, krahas këtyre që kemi aktualishtë, të tregojnë vlera”, ka thënë Erxhan Dana. /PrizrenPress.com/
Sot në pikën e kalimit të kufirit në Vërmicë, nga dy drejtorët e Përgjithshëm, atij të Policisë së Kosovës, Shpend Maxhuni dhe të Policisë së Shqipërisë, Haki Çako, u nënshkruan procedurat e përbashkëta të kontrollit kufitar, në PKK Vërmicë-Morinë, në territoret respektive.
“Këto procedura janë bërë me qëllim që të thjeshtëzojnë dhe të shpejtojnë kalimin e kufirit duke zbatuar kontrollin e plotë kufitar hyrje dalje nga secila palë, duke vendosur kabinat e përbashkëta, në dalje për palën kosovare në PKK Morinë dhe për palën shqiptare në Vërmicë”, thuhet në njoftim e Policisë.
Gjatë kalimit të kufirit do të zbatohet parimi i kontrollit kufitar në ndalje dy kontrolle.
“Kjo procedurë, pra lehtëson dhe shpejton kalimin e kufirit, por në të njëjtën kohë garanton siguri në kontrollin kufitar dhe zbaton standardet e kontrollit kufitar”. /PrizrenPress.com/
Është shpallur konkursi për edicionin e 18-të të Festivalit të këngëve të vjetra qytetare “Zambaku i Prizrenit”, një festival i themeluar që më 1986. Faza konkurruese do të zgjasë deri me 7 gusht, thuhet në njoftimin e organizuesit të të këtij festivali, Studio Helix.
Festivali do të mbahet në pjesën e dytë të muajit gusht. Kënga që do të zërë vendin e parë, përveç “Zambakut të Argjend”, do të shpërblehet me shumën prej 500 euro, vendin i dytë do të shpërblehet me shumë prej 300 euro dhe vendi i tretë me prej 200 euro. Kënga më e mirë e zgjedhur nga publiku, përveç me “Mikrofonin e Artë”, do të shpërblehet edhe prej 300 euro.
Festivali i këngës qytetare “Zambaku i Prizrenit” është shenja dalluese e qytetit të Prizrenit në fushën e organizimeve muzikore, duke e nxitur krijimin e muzikës së mirëfilltë qytetare dhe duke krijuar hapësirë për afirmim të emrave të ri të kompozitorëve dhe këngëtarëve.
“Edicioni i 28 i Festivalit Zambaku i Prizrenit, do të jetë një pikë kthese, jo vetëm në organizimin cilësor të festivalit por edhe cilësinë e pjesëmarrjes së këngëve të vjetra qytetare”, thotë Istref Krasniqi, drejtor i Studio Helix, i cili pohon se festivali i këtij edicioni do të dallohet që nga përgatitja e skenës, përformimi live e deri te cilësia e këngëve.
Kushtet për konkurrim janë këto:
– Këngët konkurruese duhet të kenë vlera të mirëfillta muzikore në frymën e këngës së vjetër qytetare ndërsa pjesëmarrësit në konkurs duhet të dërgojnë:
demo incizimin e këngës dhe tekstin në dy kopje.
– Punimet dërgohen me shifër, ndërsa në zarf të veçantë dërgohet emri dhe mbiemri i plotë i autorit me adresë të saktë dhe me numër të telefonit.
Do të shqyrtohen vetëm kompozimet e reja të cilat janë në frymën e muzikës së vjetër qytetare.
Festivali ka karakter garues.
Punimet duhet të dorëzohen deri më 7 gusht në adresën Rruga e Saraçëve, numër 3B, ose në adresën elektronike [email protected] me shenjën për Festivalin “Zambaku i Prizrenit 2016. Edicioni i 28 i
Festivalit Zambaku i Prizrenit do të mbahet në pjesën e dytë të muajit gusht.
Informatat më të hollësishme mund të merren në numrin e cel 044/049 187 394
Shpërblimet
Juria profesionale ndan tri vendet e para për këngët më të mira të festivalit. Kënga fituese shpërblehet me trofeun “Zambaku i Argjend”, përderisa votat e publikut përcaktojnë këngën më të mirë të zgjedhur nga publiku e cila shpërblehet me trofeun “Mikrofoni i Artë”.
Kënga që do të zërë vendin e parë, përveç “Zambakut të Argjend” do të shpërblehet me shumën prej 500 Euro, vendin i dytë, do të shpërblehet me shumë prej 300 Euro dhe vendi i tretë do të shpërblehet me shumën prej 200 Euro. Kënga më e mirë e zgjedhur nga publiku përveç me “Mikrofonin e Artë” do të shpërblehet edhe prej 300 Euro. Trofeu “Zambaku i Argjend” i takon kompozitorit, ndërsa Trofeu “Mikrofoni i Artë” i takon këngëtarit, Shpërblimet tjera në mënyrë të barabartë i takojnë këngëtarit dhe kompozitorit të këngëve fituese.
Historiku i Festivalit
Festivali i këngës qytetare “Zambaku i Prizrenit” është themeluar në vitin 1986 nga institucionet e atëhershme kulturore të Kosovës, si ngjarje e vetme kulturore që kultivon zhanrin muzikës qytetare.
Festivali tradicional është iniciuar nga produkcioni muzikor i ish-RTP-së, me ç’rast e tërë orkestra e këtij institucioni është angazhuar në realizimin dhe përcjelljen e këngëve konkurruese. Ideolog i “Zambakut…” ka qenë redaktori i programit muzikor, Reshat Randobrava, i ndihmuar nga drejtori i programit të atëhershëm, Akil Koci. Në kohët e okupimit serb, me shkatërrimin e institucioneve kulturore dhe produkcionit muzikor të RTP-së, përgjegjësinë për ruajtjen e traditës e merr SHKA “Agimi”, e cila arrin që këtë festival ta bart në vitet pasluftës, prej kur komuna e Prizrenit merr përsipër menaxhimin e tij.
Pak vite më pas pushteti lokal nis dhënien në menaxhim dhe organizim të festivalit përmes konkursit (tenderit), praktikë kjo që ende aplikohet. /PrizrenPress.com/
Rreth orës 15:12, policia në Dragash ka pranuar një informacion nga Qendra e Mjekësisë Familjare i cili bënte me dije se aty kishte mbërri një person i gjinisë mashkullore me plagë në trup dhe pa shenja jete, shkruan PrizrenPress.
Policia Rajonale e Prizrenit njofton se njësite relevante të policisë dhe krim teknikës kanë dalë në vendin e ngjarjes për të kryer hetime ku ishte i pranishëm edhe prokurori i shtetit. Vendi i ngjarjes dyshohet të jetë në një veturë në parkingun e pompës së karburanteve “Bashkimi Petrol” në Bresanë të Dragashit.
“Hetuesit rajonal kanë bastisur një shtëpi në kërkim të provave dhe dëshmive materiale ku janë gjetur dhe sekuestruar dy pistoleta. Po ashtu është sekuestruar edhe revolveri me numër serik U 00146 me pesë fishekë dhe një gëzhojë me të cilin dyshohet të jetë kryer vrasja. Në cilësi të personit të dyshuar është arrestuar një 48 vjeçar, i afërt me viktimën”, bën të ditur zëdhënësi i Policisë Rajonale të Prizrenit, Hazir Berisha.
Në ditët në vazhdim pritet të zbardhen rrethanat e ngjarjes. Trupi i pa jetë është dërguar për autopsi. /PrizrenPress.com/
Me qëllimin më të mirë për të krijuar siguri dhe rend, për të krijuar një partneritet me qytetarët e Komunës së Prizrenit, për të qenë më afër tyre dhe për t’i u përgjigjur sfidave që dalin para nesh, prej sot ka filluar të punojë Stacioni Policor në Lubizhdë i njohur edhe si Stacioni Policor – Veriu.
“Ky stacion është i vendosur në objektin e drejtorisë rajonale dhe është plotësisht i kompletuar edhe me personel edhe me logjistikë për të kryer detyrat dhe për t’u ballafaquar me sfidat të cilat e presin. Iniciativën për themelimin e stacionit të ri e ka marrë Drejtoria Rajonale e Policisë në Prizren dhe është përkrahur pa rezervë nga Drejtoria e Përgjithshme e Policisë”, thuhet në njoftim.
Më tej thuhet se stacioni i ri e ka të definuar qartë territorin që do ta ketë në kompetencë dhe ky territor përbëhet prej 27 fshatrave me rreth 43874 banorë të etnive të ndryshme, me 172.41m2. Po ashtu në këtë territor veprojnë numri më i madh i bizneseve dhe operatorëve ekonomik por edhe objekte tjera të rëndësishme.
“I njoftojmë qytetarët e këtyre fshatrave Caparc, Arbanë, Gërnaçar, Kabash, Krushë e Vogël, Korishë, Landovicë, Lubizhdë, Lutogllavë, Malësi e Re, Medvec, Novakë, Novosellë, Petrovë, Piranë, Prizren (një pjesë), Randobravë, Sërbicë e Epërme, Sërbicë e Poshtme, Skorobisht, Smaç, Shpenadi, Trepetnicë, Velezhë, Vërbiçan, Dojnicë, Zojz, që kurdo që kanë nevojë për dokumentacion që jepet nga policia tani e tutje të vijnë në Lubizhdë”, thuhet në njoftim. /PrizrenPress.com/